ថ្មីៗនេះនៅលើបណ្តាញសង្គមហ្វេសប៊ុក និង TikTok បានកំពុងផ្ទុះការចាប់អារម្មណ៍ខ្លាំងជាមួយរូបភាព និង វីដេអូ ដ៏រំភើបចិត្ត ដែល CEO វ័យក្មេងរូបសង្ហា លោក អ៊ឹង ស៊ីវឈន់ បានធ្វើ Proposal សុំគូស្នេហ៍រៀបការយ៉ាងរ៉ូមែនទិក។ កម្មវិធីនេះ ធ្វើឡើងជាលក្ខណៈឯកជន ជាពិសេស មានការចូលរួមច្រៀងអបអរបង្កភាពភ្ញាក់ផ្អើល ពីព្រះនាងតូច នរោត្តម ចេនណា និង លោក All3rgy សមាជិកក្រុម La Cima Cartel ផងដែរ។
ក្នុងនោះ គូស្នេហ៍ដែល លោក អ៊ឹង ស៊ីវឈន់ សុំរៀបការ ជាបុត្រីក្នុងសែរាជវង្ស គឺព្រះអង្គម្ចាស់ក្សត្រិយ៍ នរោត្តម ពង្សសូរិយា។ ទ្រង់ជាព្រះបុត្រីរបស់សម្តេចព្រះមហិស្សរា នរោត្តម ចក្រពង្ស ឧត្តមប្រឹក្សាផ្ទាល់របស់ព្រះមហាក្សត្រ ព្រះករុណាព្រះបាទសម្តេចព្រះបរមនាថ នរោត្តម សីហមុនី និង ជាសមាជិកក្រុមប្រឹក្សាធម្មនុញ្ញ និង ព្រះមាតាព្រះនាម មែន កែវមុនីរ៉ែន ។
ដោយឡែក ងាកមកនិយាយពីបទចម្រៀងមានចំណងជើងថា «សូរិយា (អេតាស៊ីវិល)» ឬ «ព្រះនាងតូច» ដែលជាការបកស្រាយដោយព្រះនាងតូច នរោត្តម ចេនណា និង លោក All3rgy សមាជិកក្រុម La Cima Cartel ឯណោះវិញ បើទោះជាមិនទាន់បានចេញជាផ្លូវការក្តី ប៉ុន្តែបទនេះពិតជាទទួលបានការគាំទ្រយ៉ាងខ្លាំង។
យ៉ាងណាមិញ ចម្រៀងខាងលើក៏បានថតចប់រួចរាល់ហើយដែរ នៅឯទឹកដីខេត្តសៀមរាប ដោយមានការចូលរួមថតបែប Pre-Wedding ពីលោក អ៊ឹង ស៊ីវឈន់ និង អនាគតភរិយា អង្គម្ចាស់ក្សត្រិយ៍ នរោត្តម ពង្សសូរិយា។ លើសពីនោះ អ្វីដែលកាន់តែពិសេស គឺមានការចូលរួមសម្តែងជា MV ដោយព្រះនាងតូច នរោត្តម ចេនណា និង សមាជិកក្រុម La Cima Cartel ទាំង ៧ រូប ទៀតផង។
អ្វីដែលគួរឱ្យចាប់អារម្មណ៍ តាមរយៈការឱ្យដឹងពីលោក All3rgy បានឱ្យដឹងថា MV នៃចម្រៀងខាងលើនេះ គឺបានបង្ហាញពីវប្បធម៌ អរិយធម៌របស់ខ្មែរ ដោយមានការចេញជាផ្លូវការនៅថ្ងៃទី ២៩ ខែមីនា ឆ្នាំ ២០២៥ ខាងមុខនេះហើយ៕
សូមចុចទីនេះ ដើម្បីទស្សនាវីដេអូ៖
