ជាការពិតណាស់ អ្នកគាំទ្ររបស់កំពូលតារាចម្រៀងរ៉េប វណ្ណដា ច្បាស់ជាបានជ្រាបហើយនូវព្រឹត្តិការណ៍ប្រគំតន្ត្រីទោលរបស់លោក កាលពីពេលកន្លងទៅ ដែលរៀបចំឡើងនៅឯខេត្តបាត់ដំបង និង ទីក្រុងភ្នំពេញ នាស្តាតអូឡាំពិកយ៉ាងកក្រើក។
ក្នុងការប្រគំតន្ត្រីទោលនោះដែរ វណ្ណដា មិនត្រឹមតែបានបង្ហាញពីចម្រៀងក្នុង Album ចុងក្រោយរបស់លោកប៉ុណ្ណោះទេ តែតារាចម្រៀងរ៉េបកម្ពុជារូបនេះ បានពាំនាំនូវអរិយធម៌ វប្បធម៌ជាច្រើនរបស់ខ្មែរដាក់បញ្ជូលក្នុងតន្ត្រីរបស់លោកទៀតផង។
ដោយឡែកកាលពីពេលថ្មីៗនេះ តារាចម្រៀងរ៉េប វណ្ណដា បានធ្វើឱ្យអ្នកគាំទ្រចាប់ក្រសែភ្នែកជាថ្មីទៅកាន់លោកទៀតហើយ ដោយក្នុងការប្រគំតន្ត្រីនៅកោះពេជ្រ វណ្ណដា បានតុបតែងខ្លួនជាយុវវ័យទាន់សម័យ ប៉ុន្តែមិនភ្លេចឡើយក្នុងការបង្ហាញនាមជាខ្មែរ។
ក្នុងនោះ វណ្ណដា បានពាក់អាវ ដោយមានអក្សរ «CAMBODIA» និង រូបទង់ជាតិកម្ពុជា បង្ហាញលើឆាកតន្ត្រីដ៏ធំ ដែលមានការចូលរួមទស្សនាពីភ្ញៀវជាតិ និង អន្តរជាតិជាច្រើន៕
