គិតមកដល់ពេលនេះ ជិត ១ ខែហើយ ដែលកម្មវិធី Miss Universe Cambodia បានរកឃើញនូវរាជិនីម្ចាស់មកុដថ្មី MUC 2025 ដែលបានទៅលើបវរកញ្ញាពេញដោយសមត្ថភាព រូបសម្រស់ និង ចំណេះដឹង គឺអ្នកនាង ថៃ នារីសុជាតា ហៅ ហ្វីយ៉ាតា ដែលនាងនឹងត្រៀមខ្លួនតំណាងឱ្យកម្ពុជា ដើម្បីចូលរួមប្រកួតលើឆាកអន្តរជាតិ Miss Universe លើកទី ៧៤ ឆ្នាំ ២០២៥ នេះ។
ចំពោះដំណើរការប្រកួតកម្មវិធីអន្តរជាតិ Miss Universe លើកទី ៧៤ នេះដែរ ត្រូវបានប្រកាសជាផ្លូវការថា នឹងរៀបចំធ្វើឡើងនៅឯប្រទេសថៃ ចាប់ពីថ្ងៃទី ១៩ ដល់ថ្ងៃទី ២១ ខែវិច្ឆិកា ឆ្នាំ ២០២៥ ខាងមុខ។
ងាកមកមើលម្ចាស់មកុដ Miss Universe Cambodia 2025 អ្នកនាង ហ្វីយ៉ាតា ចាប់តាំងពីគ្រងមកុដដ៏អស្ចារ្យនេះ ឃើញថាអ្នកនាងបានបង្ហាញការត្រៀមខ្លួនហ្វឹកហាត់យ៉ាងស្វាហាប់ ដ្បិតតែមិនទាន់មានការសម្រេចចិត្តច្បាស់ក្នុងដំណើរឆ្ពោះទៅប្រកួតលើឆាកអន្តរជាតិនេះ ខណៈមហាជនអ្នកគាំទ្រកម្ពុជាមានទាំងការគាំទ្រលើកទឹកចិត្ត និង ក្ដីបារម្ភពីសុវត្ថិភាពរបស់នាងក្នុងការតំណាងកម្ពុជាទៅប្រកួតលើទឹកដីប្រទេសថៃនោះ។
ដោយឡែក ខណៈសល់តែជាង ១ ខែទៀតកម្មវិធីនឹងចាប់ផ្ដើមប្រកួត ក៏ឃើញហ្វេសប៊ុករបស់បវរកញ្ញា ហ្វីយ៉ាតា បានបង្ហាញឱ្យដឹងថា នាងនឹងសម្រេចចិត្តជាផ្លូវការក្នុងការតំណាងប្រទេសចូលរួមប្រកួតលើឆាកអន្តរជាតិ Miss Universe នៅឯប្រទេសថៃ។
ក្រៅពីបង្ហាញលើហ្វេសប៊ុករបស់ខ្លួន ថ្មីៗនេះ ក៏បានឃើញអ្នកនាង ហ្វីយ៉ាតា ចូលរួមក្នុងកម្មវិធីកិច្ចសម្ភាស «3 FUN» និយាយទាក់ទងនឹងការសម្រេចចិត្តទៅប្រកួតលើអន្តរជាតិ ដែលនាងបានបញ្ជាក់យ៉ាងច្បាស់ៗថានឹងទៅចូលរួមប្រកួត ដោយក្នុងនោះ បវរកញ្ញារូបនេះ ក៏បានប្រាប់ពីមូលហេតុដែលជំរុញចិត្តរបស់នាងយ៉ាងមោះមុតត្រូវតែទៅប្រកួត ទោះត្រូវជួបនឹងឧបសគ្គធំតូចបែបណាក៏ដោយ។
ក្នុងវីដេអូកិច្ចសម្ភាសនោះ អ្នកនាង ហ្វីយ៉ាតា បានរៀបរាប់ថា ៖ «ចាប់តាំងពីចូលមកប្រកួតយើងដឹងហើយថាកម្មវិធីនឹងប្រព្រឹត្តនៅប្រទេសណា ហើយខ្ញុំតែងតែប្រាប់ខ្លួនឯងថា បើសិនជាខ្ញុំឈ្នះមកុដ ឆាកអន្តរជាតិទាំងមូលអត់អាចខ្វះទង់ជាតិរបស់ប្រទេសកម្ពុជាយើងបានទេ ហើយពាក្យនឹងគឺនៅក្នុងខួរក្បាលខ្ញុំវិលទៅវិលមករហូត។ ហើយពេលនេះ ខ្ញុំអាចឈ្នះបានមកុដតំណាងឱ្យប្រទេសកម្ពុជាហើយ ហេតុអីបានខ្ញុំអត់អាចយកទង់ជាតិខ្មែរយើងទៅលើឆាកនឹងបាន អ៊ីចឹងខ្ញុំគិតថា ទោះបីជាមានឧបសគ្គធំនៅខាងមុខ ឬក៏មិនមាន ឬណាយ៉ាងណាក៏ដោយ តែការប្ដេជ្ញាចិត្តរបស់ខ្ញុំដែលត្រូវយកទង់ជាតិកម្ពុជាទៅលើឆាកអន្តរជាតិត្រូវតែបន្ត។
ម្យ៉ាងទៀត ខ្ញុំក៏ទទួលបានដំណឹងពី ND ផ្ទាល់ ដែលបានពិភាក្សាជាមួយខាងកម្មវិធីអន្តរជាតិ ហើយខាងកម្មវិធី MU ក៏ផ្ដាំទៅ ND កម្ពុជាវិញថា គេមិនចង់ឱ្យបាត់បង់បេក្ខភាពពីប្រទេសណាមួយទេ គឺគេចង់ស្វាគមន៍យើង ឱ្យយើងទៅប្រកួតទាំងអស់គ្នា»៕
សូមចុចទីនេះដើម្បីទស្សនាវីដេអូ៖
