និយាយពីតារាសម្ដែងស្រីដ៏ឆ្នើមកញ្ញា ស៊ីន យូប៊ីន ប៉ុន្មានឆ្នាំចុងក្រោយ កាន់តែក្លាយជាតារាស្រីដ៏មានសក្កានុពលលើឆាកអន្តរជាតិ ខណៈនាងទទួលបានឱកាសធំៗក្នុងការចូលរួមកម្មវិធីអន្តរជាតិផ្សេងៗ ដែលទទួលបានការអញ្ជើញពីកម្មវិធី និង ប៊្រេនធំៗលំដាប់ពិភពលោកចូលរួមកម្មវិធីជាមួយនឹងកំពូលតារាល្បីៗពីបណ្ដាប្រទេសផ្សេងៗពេញដោយមោទកភាពសម្រាប់កម្ពុជា។
ជាក់ស្ដែង កាលពីចុងឆ្នាំ ២០២៤ កន្លងទៅ ស៊ីន យូប៊ីន ក៏បានធ្វើឱ្យមហាជនអ្នកគាំទ្រកម្ពុជាមានក្ដីរំភើប និង មោទកភាពលើរូបនាងជាថ្មី ដែលបានឃើញវត្តមានរបស់តារាស្រីរូបនេះ បានហោះទៅក្រៅប្រទេសចូលរួមកម្មវិធីធំៗបន្តបន្ទាប់ ៣ ថ្ងៃជាប់គ្នាចេញពីប្រទេសមួយទៅប្រទេសមួយទៀតផង។
ដោយឡែក ក្រោយពីត្រឡប់ពីក្រៅប្រទេសវិញ ស្រាប់តែមួយរយៈក្រោយនេះ ចាប់តាំងពីដើមឆ្នាំ ២០២៥ មក គេសង្កេតឃើញតារាស្រីរូបនេះ ស្ងាត់បាត់មុខមិនសូវឃើញបង្ហាញខ្លួនលើវិស័យសិល្បៈឡើយ។ ស្របពេលនេះដែរ អ្វីដែលធ្វើឱ្យមហាជនអ្នកគាំទ្រកំពុងចាប់អារម្មណ៍ និង ភ្ញាក់ផ្អើល ក្រោយពីបានឃើញវីដេអូមួយបង្ហាញពីសកម្មភាពរបស់តារាស្រីរូបនេះ កំពុងបួសជាជីព្រហ្មស្លៀកពាក់ឈុតស រៀនធម៌ សមាធិ និង ជួយធ្វើការងារផ្សេងៗក្នុងវត្តមួយនៅលើទឹកដីខេត្តសៀមរាបពេញដោយសេចក្ដីជ្រះថ្លា៕
សូមចុចទីនេះដើម្បីទស្សនាវីដេអូ៖
