មហាជនអ្នកតាមដានទស្សនីយភាពសិល្បៈល្ខោនបាមោជ្ជទ័យ រឿង «កុលាបប៉ៃលិន» សុទ្ធតែបានជ្រាបហើយថា មួយរយៈថ្មីកន្លងទៅនេះ លើបណ្ដាញសង្គមទាំងហ្វេសប៊ុក និង TikTok ផ្ទុះការចាប់អារម្មណ៍ចែករំលែក និង សរសើរខ្លាំងពីការរៀបចំសម្ដែងទម្រង់រឿងល្ខោននេះ ជាពិសេសគឺទេពកោលស្យសម្ដែងរបស់តួអង្គនីមួយៗ។
ក្នុងនោះ មហាជនអ្នកគាំទ្រលើបណ្ដាញសង្គមជាច្រើន ជាពិសេសមហាជនដែលបានចូលរួមទស្សនាដោយផ្ទាល់មានការស្ងើចសរសើរខ្លាំងចំពោះតួប្រុស និង តួស្រី ដែលសុទ្ធតែស្រស់ស្អាតស្រស់សង្ហា រីឯទេពកោសល្យសម្ដែងវិញ គឺសម្ដែងបានល្អខ្លាំង ទាំងការនិយាយ និង កាយវិការសមជាមួយសាច់រឿងឥតខ្ចោះ។
ចំពោះតួអង្គស្រី ឃុន នារី សម្ដែងដោយកញ្ញា កែវ សុផានិត ដែលត្រូវបានគេស្គាល់ថាជាគ្រូល្ខោនយីកេ តារាសម្តែង និង ជាតារាចម្រៀងមួយរូប រីឯតួអង្គប្រុស ចៅចិត្រ សម្ដែងដោយលោក ថេង គឹមស មកពីក្រុមល្ខោននិយាយ និង ជាតារាសម្ដែងផងដែរ។
យ៉ាងណាមិញ ស្របពេលកំពុងផ្ទុះប្រជាប្រិយភាពខ្លាំងក្នុងការសម្ដែងនូវទម្រង់ល្ខោននេះដែរ ថ្មីៗនេះ ក៏បានឃើញតួប្រុសស្រីមួយគូនេះ ត្រូវបានអញ្ជើញចូលរួមធ្វើកិច្ចសម្ភាសក្នុងកម្មវិធី «3 FUN» ដែលបាននិយាយរៀបរាប់ទាក់ទងនឹងការសម្ដែង ក៏ដូចជាសមត្ថភាព ទេពកោសល្យរបស់អ្នកទាំងពីរលើវិស័យសិល្បៈបុរាណនេះផងដែរ។
ក្នុងវីដេអូសម្ភាសនេះដែរ អ្វីកាន់តែចាប់អារម្មណ៍ និង សរសើរពីសមត្ថភាពរបស់តួប្រុសស្រីមួយគូនេះ ខណៈស្ដាប់ការរៀបរាប់ ក៏ដូចជាបង្ហាញសកម្មភាពសម្ដែងផ្ទាល់ៗរបស់អ្នកទាំងពីរ បានឱ្យដឹងថា កញ្ញា កែវ សុផានិត និង លោក គឹម ស មិនត្រឹមពូកែផ្នែកសម្ដែងក្នុងទម្រង់ល្ខោនខាងលើប៉ុណ្ណោះទេ តែអ្នកទាំងពីអាចសម្ដែងល្ខោនបានច្រើនទម្រង់ទៀតយ៉ាងប៉ិនប្រសប់ មានល្ខោនយីកេ ល្ខោននិយាយ និង សិល្បៈបុរាណច្រើនទម្រង់ផ្សេងៗទៀតផង៕
សូមចុចទីនេះដើម្បីទស្សនាវីដេអូ៖
