កាលពីល្ងាចថ្ងៃទី ០៥ ខែមីនា ឆ្នាំ ២០២៥ កន្លងទៅនេះ ក្រសួងវប្បធម៌ និង វិចិត្រសិល្បៈ បានរៀបចំកម្មវិធី «អបអរមហាបវរធិបតី សាទរទិវាវប្បធម៌ជាតិ ៣មីនា លើកទី ២៧» និង «ពិធីសំណេះសំណាល ពិសាអាហារសាមគ្គីជាមួយសិល្បករ សិល្បការិនីលើកទី ៦» ដោយមានការចូលរួមពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោក ជំទាវ ព្រមទាំងថ្នាក់ដឹកនាំក្រសួង ស្ថាប័នពាក់ព័ន្ធ និង សិល្បករ សិល្បការិនីជាច្រើនរូប។
ក្នុងនោះដែរ ការប្រារព្ធទិវាវប្បធម៌ជាតិជារៀងរាល់ឆ្នាំ គឺជាព្រឹត្តិការណ៍ពញ្ញាក់អារម្មណ៍ និង បំផុសឱ្យកូនខ្មែររួមគ្នាការពារ ថែរក្សា និង លើកស្ទួយវប្បធម៌ ប្រពៃណីជាតិ ក្នុងស្មារតីរួម «ទាំងអស់គ្នា ដើម្បីវប្បធម៌ជាតិ វប្បធម៌ជាតិ ដើម្បីទាំងអស់គ្នា»។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងក្នុងឱកាសប្រារព្ធ «ទិវាវប្បធម៌ជាតិ ៣ មីនា លើកទី ២៧ ឆ្នាំ២០២៥» និង «ពិធីសំណេះសំណាលជាមួយសិល្បករ សិល្បការិនី ទូទាំងប្រទេសលើកទី ៦» នាល្ងាចថ្ងៃទី៥ ខែមីនា ឆ្នាំ២០២៥ ក៏បានកោតសរសើរចំពោះភាពច្នៃប្រឌិត និង បំផុសចលនាលើកស្ទួយសិល្បៈវប្បធម៌ខ្មែរទៅលើឆាកអន្តរជាតិផងដែរ។
លើសពីនោះ សម្តេចមហាបវរធិបតី ក៏បានមានប្រសាសន៍ពាក់ព័ន្ធនឹងវិស័យចម្រៀងរ៉េបថា៖ «… កន្លងទៅ ថ្ងៃមុនឃើញមានក្រសួងធ្វើការណែនាំរឿងការប្រើប្រាស់ពាក្យនៅក្នុងបទចម្រៀង ថ្ងៃមុនឃើញមានបទចម្រៀងរ៉េប បងប្អូនគាត់តែងចុះ តែងឡើង បែរទៅជាដាក់ប្រយុទ្ធគ្នា ជេរគ្នា អាចម្រៀងរ៉េបហ្នឹង នៅអាមេរិក ភាសាអង់គ្លេស ក៏មានអាខ្លះវាហៅថា Rap វាខ្លាំង វាហៅ core អាហ្នឹង គឺរឹង សាហាវ ប្រើពាក្យបាញ់ ប្រើពាក្យជេរ រឿងរ៉េបយើងយកទំនុកគេមក យើងច្នៃ ប៉ុន្តែមិនចាំបាច់ទៅកែពាក្យជេរទេ មិនចាំបាច់ថា រ៉េបទាល់តែជេរដូចអាមេរិកបានល្បីនោះទេ រក្សាភាពថ្លៃថ្លូរ គោរពគ្នាក៏ល្បីដែរ។ ប្អូនៗខ្ញុំឃើញគាត់ល្បី ហើយគាត់ល្បីតាំងពីមុនគាត់តែងបទ ដែលមានពាក្យជេរហ្នឹងហ្ហ៎ ចឹងបើសិនជាយើងធ្វើហើយ ជោគជ័យហើយ ដោយមានរក្សាភាពថ្លៃថ្លូរ រក្សានូវវប្បធម៌របស់យើងបានល្បីហើយ យើងមិនចាំបាច់ទៅកុពីពីគេទេនោះទេ ហើយយើងត្រូវរួមគ្នាដើម្បីរក្សាអត្តសញ្ញាណរបស់យើង ដែលមិនត្រូវអភិវឌ្ឍតាមកុពីនោះទេ គឺអភិវឌ្ឍតាមបែបបទរបស់យើង មានព្រំដែនរបស់យើង…»។
សូមចុចទីនេះ ដើម្បីទស្សនាខ្លឹមសារទាំងស្រុង៖
