ស្របពេល កម្មវិធី Miss Universe Cambodia កំពុងត្រៀមបើកដំណើរការប្រកួតជ្រើសរើសម្ចាស់រាជិនីគ្រងមកុដថ្មី Miss Universe Cambodia 2025 ក្រឡេកមើលបណ្ដាញសង្គម គេសង្កេតឃើញមានក្រុមអ្នកគាំទ្រ ក៏ដូចជាបណ្ដាផេកតាមដានគាំទ្រវិស័យបវរកញ្ញាជាច្រើន បានលើកយករូបភាពស្រីស្អាតដ៏ស័ក្តិសម និង ធ្លាប់មានបំណងចង់ចូលរួមប្រកួតកម្មវិធី MUC កន្លងមកនោះ មកបង្ហោះស្ទង់មតិមហាជនអ្នកគាំទ្រថា ស្រីស្អាតរូបណាដែលស្ថិតក្នុងចិត្តអ្នកគាំទ្រស័ក្តិសមជាម្ចាស់មកុដ MUC 2025 នេះ។
ជាក់ស្ដែង ក្នុងចំណោមស្រីស្អាតជាច្រើនរូបដែលបានបង្ហោះស្ទង់មតិលើហ្វេសប៊ុកផេកផ្សេងៗកន្លងមក ក៏ឃើញមានបវរកញ្ញា ពេជ្រ វត្តីសារ៉ាវឌ្ឍី ត្រូវបានជំរុញឱ្យចូលប្រកួតក្នុងកម្មវិធី MUC 2025 ដែរ ដោយមើលឃើញពីសក្កានុពលរបស់នាង និង ជាបរវកញ្ញាមានបទពិសោធច្រើនលើវិស័យនេះ។
អ្វីកាន់តែចាប់អារម្មណ៍ទៀត ក្រឡេកមើលមហាជនអ្នកគាំទ្រវិញ ក្រោយពីឃើញហ្វេសប៊ុកផេកមួយចំនួនបង្ហោះពី ពេជ្រ វត្តីសារ៉ាវឌ្ឍី ក៏មានមហាជនជាច្រើនបានចូលបញ្ចេញមតិ និង បង្ហាញការពេញចិត្តគាំទ្រ ប៉ុន្តែក្នុងនោះ ក៏មានមហាជនមួយចំនួនបានបញ្ចេញមតិ និង មានការគិតផ្សេងផងដែរ។
ជាមួយគ្នានោះ ក៏បានឃើញបវរកញ្ញា ពេជ្រ វត្តីសារ៉ាវឌ្ឍី បានចេញបង្ហោះដោយផ្ទាល់ជុំវិញរឿងនេះ ដោយកញ្ញាពុំទាន់បញ្ជាក់ច្បាស់ថានឹងបន្តក្ដីស្រមៃចូលប្រកួត MUC នេះ ឬយ៉ាងណាទេ ដោយគ្រាន់តែឃើញនាងលើកយកការបង្ហោះរបស់ផេក Sash Factor ដោយចូលមើលអ្នកគាំទ្ររបស់នាង ឃើញមានទាំងអ្នកពេញចិត្ត និង អ្នកចាំសើចនាងទៀតផង។
ក្នុងនោះដែរ ពេជ្រ វត្តីសារ៉ាវឌ្ឍី ក៏បានភ្ជាប់ជាមួយសារមួយរៀបរាប់ថា ៖ «ផ្ញើជូនអ្នកទាំងអស់គ្នាដែលកំពុងតែដើរតាមក្តីស្រមៃខ្លួនឯង អ្នកត្រូវចាំថាក្នុងពេលដែលអ្នកដើរមិនទាន់ដល់គោលដៅ តែងតែមានមនុស្សពីរប្រភេទនេះ នឹងចាំមើលអ្នកជានិច្ច អ្នកចាំសើចអ្នក និង អ្នកដែលស្រឡាញ់អ្នក ហើយវាមិនសំខាន់ថាខាងណាច្រើនជាងខាងណាទេ តែវាសំខាន់ត្រង់ថាតើអ្នកនឹងរើសមើលមួយណាសំខាន់ជាង Look in to only positive supports they are my best energy ever»៕
សូមទស្សនាវីដេអូខាងក្រោម៖
