បើគិតមកដល់ពេលនេះ រយៈពេលជាង ២០ ឆ្នាំមកហើយ បើគិតចាប់តាំងពីតារាចម្រៀង ខេមរៈ សិរីមន្ត ទទួលបានជ័យលាភីលេខ ១ ក្នុងការប្រកួតចម្រៀងកាលពីអំឡុងឆ្នាំ ២០០៣ និង ការបោះជំហានចូលក្នុងវិថីសិល្បៈ។
យ៉ាងណាមិញ ថ្មីៗនេះ ឧកញ៉ា ខេមរៈ សិរីមន្ត បានបង្ហោះវីដេអូមួយបង្ហាញនូវសមិទ្ធផលជាពានរង្វាន់ដែលលោកទទួលបានពីការប្រឹងប្រែង និង ភាពល្បីល្បាញក្នុងវិស័យសិល្បៈជូនដល់មហាជនឱ្យបានដឹងថែមទៀតផង។ ក្នុងនោះ ឧកញ៉ា ខេមរៈ សិរីមន្ត បានបង្ហាញប្រាប់ច្បាស់ៗថា លោកទទួលបានទាំងពានរង្វាន់ពីក្នុងប្រទេស និង ក្រៅប្រទេសផងដែរ។
អ្វីដែលគួរឱ្យចាប់អារម្មណ៍ នៅចុងវីដេអូនៃការបង្ហាញសមិទ្ធផលពានរង្វាន់ពីវិថីសិល្បៈនេះ ឧកញ៉ា ខេមរៈ សិរីមន្ត ក៏បានលើកឡើងយ៉ាងមានន័យជុំវិញការផលិតបទចម្រៀងថ្មីៗរបស់លោក ដោយលោកមិនបញ្ចូលដាច់ខាតនូវពាក្យអសុរោះក្នុងបទចម្រៀង មិនថាទម្រង់ណានោះឡើយ ដើម្បីធ្វើជាគំរូល្អដល់ប្អូនៗសិល្បៈជំនាន់ក្រោយ។ «… យ៉ាងណាក៏ដោយ ឧកញ៉ានឹងមិនដាក់ពាក្យអសុរសក្នុងចម្រៀងនោះទេ ដើម្បីជាប្រយោជន៍ និង គំរូដល់យុវជនជំនាន់ក្រោយ» នេះជាការលើកឡើងរបស់តារាចម្រៀង និង ជាឧកញ៉ា ខេមរៈ សិរីមន្ត៕
សូមចុចទីនេះ ដើម្បីទស្សនាវីដេអូលម្អិត៖
