កាលពីថ្ងៃទី ១៧ ខែឧសភា ឆ្នាំ ២០២៥ កន្លងទៅនេះ ការប្រគំតន្ត្រីទោល «ត្រីវិស័យ សុវណ្ណភូមិ» របស់កំពូលតារាចម្រៀងរ៉េប វណ្ណដា បានរៀបចំយ៉ាងគគ្រឹកគគ្រេង ដោយមានការចូលរួមពីសំណាក់អ្នកគាំទ្រជាតិ និង អន្តរជាតិប្រមាណរាប់ម៉ឺននាក់។
ក្នុងនោះ ការប្រគំតន្ត្រីទោល ដ៏ធំប្រចាំឆ្នាំរបស់ វណ្ណដា បានធ្វើឱ្យអ្នកគាំទ្របានចែករំលែកនូវទិដ្ឋភាពនៃផ្ទាំងទស្សនីយភាព ដោយមានទាំងសម័យ និង បុរាណ ព្រមទាំងល្ខោនបាសាក់ ថែមទៀតផង។ លើសពីនោះ គឺការចូលរួមពីសំណាក់តារាចម្រៀងប្រចាំផលិតកម្មបារមី និង តារាចម្រៀងអន្តរជាតិជាច្រើនរូបទៀត។
ដោយឡែក ទន្ទឹមនឹងក្តីរំភើបរីករាយ នៃការប្រគំតន្ត្រីពីសំណាក់តារាចម្រៀងរ៉េប វណ្ណដា នោះ អ្នកចូលរួមទស្សនាដោយផ្ទាល់ ក៏បានបង្ហាញអារម្មណ៍ក្តុកក្តួល និង អាឡោះអាល័យដែរ ខណៈ វណ្ណដា បានគោរពវិញ្ញាណក្ខន្ធ ព្រឹទ្ធាចារ្យកោសល្យវោហារ គង់ ណៃ មុននឹងចាប់ផ្តើមការសម្តែងបទ «Time To Rise» ដោយបានដាក់តាំងចាប៉ីដងវែងរបស់លោកតា គង់ ណៃ នៅលើឆាកថែមទៀតផង។
អ្វីដែលកាន់តែមិនអាចទប់ទឹកភ្នែកបាន និង គួរឱ្យសរសើរដល់កំពូលតារាចម្រៀងរ៉េប វណ្ណដា នោះ គឺក្រោយការសម្តែងបទ «Time To Rise» វណ្ណដា បានទម្លាយពីបណ្តាំរបស់លោកតា គង់ ណៃ ប្រាប់លោកថា កុំឱ្យលោកភ្លេចល្ខោនបាសាក់ និង យីកេរ ហើយលោកក៏បានឆ្លើយតបថា លោកមិនដែលភ្លេចនោះទេ។
ចំណុចនេះដែរ អ្នកគាំទ្រក៏បានលើកឡើងថា ព្រោះបណ្តាំរបស់លោកតា គង់ ណៃ ទើប វណ្ណដា បានបញ្ចេញផ្នែកទី ៣ នៃ Album ចម្រៀងទី ៣ របស់លោក «Return To Sovannaphum» ដែលបទជាច្រើនបានរួមបញ្ជូលល្ខោនបាសាក់ និង យីកេរក្នុងនោះ៕
សូមចុចទីនេះ ដើម្បីទស្សនាវីដេអូ៖
