បើគិតមកដល់ពេលនេះ រយៈពេលប្រមាណជិត ៥ ឆ្នាំ មកហើយ ដែលតារាចម្រៀង Original Song លោក សាយ បានក្លាយទៅជាស្ថាបនិកកម្មវិធី Run With Sai និង បានរៀបចំព្រឹត្តិការណ៍រត់ដើម្បីសប្បុរសធម៌ ក៏ដូចជាដើម្បីសុខភាពចំនួន ១០ រួចមកហើយដែរ។
ជាការពិត កម្មវិធីរត់កន្លងមក សាយ បានរៀបចំឡើងនៅតាមបណ្តាខេត្តនានា ក្នុងប្រទេសកម្ពុជា ដើម្បីចូលរួមចំណែកជួយដល់សង្គម និង ផ្សព្វផ្សាយពីវប្បធម៌ អរិយធម៌ កេរដំណែល ព្រមទាំងតំបន់ទេសចរណ៍របស់កម្ពុជាទៅកាន់ពិភពលោកផងដែរ។
ដោយឡែក នៅថ្ងៃទី ១៦ ខែមីនា ឆ្នាំ ២០២៥ ខាងមុខនេះ សាយ បានប្រកាសចូលរួមកម្មវិធីរត់ Two Kingdoms Run 2025 ដែលជាកម្មវិធីរត់ដើម្បីចំណងមិត្តភាពកម្ពុជា-ថៃ អបអរសាទរចំណងការទូតកម្ពុជា-ថៃ រយៈពេល ៧៥ ឆ្នាំ។ កម្មវិធីរត់ឆ្លងដែននេះ នឹងរៀបចំរត់ឆ្លងកាត់ពីស្ពានមិត្តភាពស្ទឹងបត់ – បានណងអៀន។
ក្នុងនោះ មហាជនក៏អាចចូលរួមចុះឈ្មោះរត់ដើម្បីជាបទពិសោធផងដែរ ដោយកម្មវិធីនឹងប្រព្រឹត្តិទៅនៅថ្ងៃទី ១៦ ខែមីនា ឆ្នាំ ២០២៥ ដោយមានវិញ្ញាសារត់ ១១.៣ គីឡូម៉ែត្រ, ៧.៤ គីឡូម៉ែត្រ និង ៤ គីឡូម៉ែត្រ៕
សូមចុចទីនេះ ដើម្បីទស្សនាវីដេអូ៖
