មកដល់ពេលនេះ បងប្អូនមហាជនខ្មែរ អ្នកជំនួញ ក៏ដូចជាសិល្បករជាច្រើន កំពុងតែយកចិត្តទុកដាក់យ៉ាងសកម្មចំពោះកងទ័ពខ្មែរជួរមុខ ដែលកំពុងឈរជើងនៅឯព្រំដែនក្នុងកិច្ចការពារបូរណភាពទឹកដី ដោយបានបន្តបង្ហោះចែករំលែកជូនពរ លើកទឹកចិត្ត និង ផ្ដល់ជាថវិកា ចុះសួរសុខទុក្ខជូនសម្ភារៈផ្សេងៗដល់កង់ទ័ពខ្មែរបន្តបន្ទាប់។
ជាក់ស្ដែង ក្រឡេកមើលហ្វេសប៊ុករបស់តារាកំប្លែងលោក ពាក់មី វិញ ក្នុងនាមជាសិល្បករមួយរូប ក៏ឃើញលោកបង្ហាញការយកចិត្តទុកដាក់ចំពោះកងទ័ពខ្មែរជួរមុខយ៉ាងសកម្មដែរ ដោយកន្លងមកលោកបានចុះទៅសួរសុខទុក្ខកងទ័ពជួរមុខដោយផ្ទាល់ និង នាំយកថវិកា ក៏ដូចជាគ្រឿងសម្ភារៈផ្សេងៗពីសម្បុរសជន ទៅជូនបងៗកងទ័ពនៅតាមព្រំដែនផងដែរ។
មកដល់ថ្មីៗនេះ អ្វីកាន់តែធ្វើឱ្យមហាជនសរសើរ និង រំភើប ខណៈបានឃើញតារាកំប្លែងរូបនេះ បានបង្ហាញសកម្មភាពដឹកនាំអ្នកភូមិរបស់លោកនៅឯខេត្តស្វាយរៀង ដែលមានលោកយាយ លោកតា មកចូលរួមជួយវេចអន្សមចំនួន ១ ពាន់នំ ដើម្បីនាំយកទៅជូនកងទ័ពជួរមុខ។ លើសពីនេះ ក្នុងវីដេអូសកម្មភាពវេចអន្សមនេះដែរ អ្នកភូមិ លោកតាលោកយាយ ក៏បាននិយាយផ្ញាំផ្ញើជូនពរ និង ផ្ដល់កម្លាំងចិត្តយ៉ាងកក់ក្ដៅ ទៅកាន់បងប្អូនកងទ័ពនៅព្រំដែនឱ្យទទួលជោគជ័យមានសុខភាពល្អទៀតផង៕
សូមចុចទីនេះដើម្បីទស្សនាវីដេអូ៖
