កាលពីយប់ថ្ងៃទី ៣១ ខែកក្កដា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេសប្រជាជនកម្ពុជាបានបង្ហាញអារម្មណ៍ខ្លោចចិត្តយ៉ាងខ្លាំង ខណៈបានស្តាប់កិច្ចសម្ភាសរវាងស្ថាបនិក ភ្លើងគប់ កញ្ញា រិទ្ធី លំអរពេជ្រ ជាមួយនឹងបងស្រីជាក្រុមការងារលើប្រាសាទព្រះវិហារ ដែលជាបុគ្គលចុងក្រោយក្នុងចំណោម ៧ នាក់ ដែលនៅលើប្រាសាទព្រះវិហារពេលថៃបានវាយប្រហារ។
តាមកិច្ចសម្ភាស ក្រុមការងារលើប្រាសាទព្រះវិហារ ១ រូប ក្នុងចំណោម ៧ នាក់ បានឱ្យដឹងថា គាត់ និង ក្រុមការងារ ៦ នាក់ទៀត សរុប ៧ នាក់ គឺជាបុគ្គលចុងក្រោយនៅលើប្រាសាទ ដែលបានភៀសចុះមកក្រោមអំឡុងពេលថៃវាយប្រហារ។ ក្នុងនោះ បងស្រីម្នាក់បានជម្រាបថា គាត់ និង ក្រុមការងារ ៦ នាក់ ទៀត ក្រោយសំងំក្នុងត្រង់សេរយៈ ១ យប់ ២ ថ្ងៃហើយនោះ ក៏សម្រេចភៀសចុះមកក្រោមនៅយប់ថ្ងៃទី ២ នៃការបាញ់ ពោលគឺនៅថ្ងៃទី ២៥ ខែកក្កដា ឆ្នាំ ២០២៥ ខណៈគ្រាប់បន្តផ្លោង និង ទម្លាក់ជុំវិញប្រាសាទព្រះវិហារ។
បងស្រី បានបន្តថា គាត់ និង ក្រុមការងារបានចុះតាមជម្រាលទុយោទឹកទាំងយប់ងងឹត ហើយខ្លួនក៏បានធ្លាក់ជ្រោះប្រមាណជា ២០ ម៉ែត្រ បោកក្បាល ត្រូវរបួសពេញខ្លួន គិតថាស្លាប់ទៅហើយ ហើយក្នុងចំណោម ៧ នាក់ មានស្រីតែ ២ នាក់ ទេ ហើយមានម្នាក់មានកូនតូច សរសៃខ្ចីទើបនឹងឆ្លងទន្លេទៀតផង។
