បើគិតមកដល់ពេលនេះ រយៈពេលប្រមាណជិត ១ ឆ្នាំ មកហើយ ដែលតារាស្រី ភិន សុដាលីស បានចាកចេញពីប្រទេសកម្ពុជា ទៅរស់នៅសហរដ្ឋអាមេរិកជាមួយនឹងកូនស្រីបណ្តូលចិត្ត ខណៈកូនស្រីអ្នកនាង បាន និង កំពុងសិក្សានៅទីនោះ។
ជាការពិត បើទោះជាបានចាកចេញទៅរស់នៅឯសហរដ្ឋអាមេរិក ចាយជីវិតជាមួយនឹងកូនស្រី ព្រមទាំងបានរយាលដៃពីការងារសិល្បៈក្តី តែអ្នកនាង ភិន សុដាលីស នៅតែបន្តឈរជើងជាថៅកែហាងលក់ Contact Len នៅឡើយ ដោយហាងនៅក្នុងប្រទេសកម្ពុជា អ្នកនាងមានបុគ្គលិកជាអ្នកមើលថែ រីឯនៅសហរដ្ឋអាមរិក អ្នកនាងក៏បានលក់អនឡាញ សម្រាប់ភ្ញៀវកុម្មង់ទិញនៅសហរដ្ឋអាមេរិកដូចគ្នា។
ដោយឡែក អ្វីដែលគួរឱ្យសរសើរផងនោះ បើទោះជាកាលនៅស្រុកខ្មែរមានឈ្មោះជាតារាសម្តែងល្បី មានជំនួញក្នុងដៃ និង ជាកូនថៅកែផលិតកម្មល្បីក្នុងប្រទេសកម្ពុជាក្តី តែអ្នកនាង ភិន សុដាលីស ស៊ូលះបង់គ្រប់យ៉ាង ឃ្លាតឆ្ងាយពីមាតុប្រទេសហើយទៅរស់នៅសហរដ្ឋអាមេរិក ដើម្បីមើលថែកូនស្រី ព្រមទាំងបានការងារធ្វើជាបុគ្គលិកនៅទីនោះ ដល់ទៅ ២ កន្លែងឯណោះ។
យ៉ាងណាមិញ ក្រោយពីរស់នៅ ២ នាក់ ម្តាយកូននៅឯសហរដ្ឋអាមេរិកបានមួយរយៈធំហើយនោះ កាលពីថ្ងៃទី ១១ ខែមិថុនា ឆ្នាំ ២០២៥ កន្លងទៅនេះ អ្នកនាង ភិន សុដាលីស បានបង្ហាញក្តីរំភើបយ៉ាងខ្លាំង ខណៈអ្នកនាង និង កូនស្រីបានទទួលសិទ្ធិរស់នៅឯសហរដ្ឋអាមេរិកស្របច្បាប់ហើយ។ ក្នុងនោះ អ្នកគាំទ្រ និង មិត្តភក្តិរបស់អ្នកនាង បានចូលរួមអបអរសាទរដល់អ្នកនាង និង កូនស្រីជាបន្តបន្ទាប់៕
សូមចុចទីនេះ ដើម្បីទស្សនាវីដេអូ៖
