និយាយពីអ្នកបង្កើតមាតិកាហ្វេសប៊ុកជនជាតិកូរ៉េដ៏ល្បីឈ្មោះ នារីកូរ៉េ មួយរយៈថ្មីនេះ បានឆក់ការចាប់អារម្មណ៍កាន់តែខ្លាំងពីមហាជនអ្នកគាំទ្រខ្មែរលើបណ្ដាញសង្គមជាមួយនឹងការបង្ហោះផ្សេងៗលើហ្វេសប៊ុកផេករបស់នាង ទាក់ទងនឹងទឹកដីកម្ពុជាបង្ហាញពីទំហំចិត្ត និង ក្ដីស្រឡាញ់ចំពោះភាសា វប្បធម៌ ប្រវត្តិសាស្រ្តរបស់កម្ពុជាគួរឱ្យសរសើរ។
រាល់ការបង្ហោះរបស់អ្នកបង្កើតមាតិកាជនជាតិកូរ៉េរូបនេះ បានធ្វើឱ្យមហាជនខ្មែរចែករំលែកដោយក្ដីពេញចិត្ត និង សរសើរខ្លាំងចំពោះនាង ដែលក្នុងនាមជាជនបរទេសមួយរូបមានទឹកចិត្តស្រឡាញ់ និង តែងជួយផ្សព្វផ្សាយពីប្រទេសកម្ពុជាទៅកាន់ពិភពលោក។
ស្របពេលកំពុងទទួលបានក្ដីស្រឡាញ់ខ្លាំងពីមហាជនខ្មែរនេះដែរ ថ្មីៗនេះ តាមរយៈវីដេអូមួយដែល នារីកូរ៉េ បានជួបជជែកជាមួយនឹងពិធីករ ប៉ែន ចំរ៉ុង ក៏បានឃើញនាងនិយាយរៀបរាប់ពីជីវិតរស់នៅលើទឹកដីកម្ពុជារបស់នាងកន្លងមក ដោយបានឱ្យដឹងថានាងបានរស់នៅប្រទេសកម្ពុជាអស់រយៈពេល ១២ ឆ្នាំមកហើយ។
លើសពីនេះ អ្វីដែលគួរឱ្យចាប់អារម្មណ៍ទៀតនោះ គឺ នារីកូរ៉េ បានរៀបរាប់ឱ្យដឹងពីមូលហេតុដែលធ្វើឱ្យនាងអាចរស់នៅទឹកដីកម្ពុជាបានយូរឆ្នាំបែបនេះ ក៏ដោយសារតែនាងស្រឡាញ់ទឹកដីកម្ពុជា ម្ហូបអាហារល្អ ប្រជាជនកម្ពុជាមានទឹកចិត្តបេះដូងល្អ តែងអាណិតស្រឡាញ់ និង ជួយរូបនាង ជាពិសេសនាងចាត់ទុកទឹកដីកម្ពុជាប្រៀបដូចជាថ្នាំព្យាបាលជំងឺធំមួយរបស់នាង ដែលនាងធ្លាប់កើតជំងឺមហារីក និង បានជាសះស្បើយវិញផងដែរ៕
សូមចុចទីនេះដើម្បីទស្សនាវីដេអូ៖
