ជាការពិតណាស់ មហាជននិយមតាមដានពីជីវិតឯកជនរបស់តារាចម្រៀង សុវត្ថ មុនីនាគ កូនប្រុសទី ២ របស់ ឧកញ៉ា ព្រាប សុវត្ថិ ច្បាស់ជាបានជ្រាបហើយថា ពេលនេះ លោក មុនីនាគ បាន និង កំពុងរស់នៅឯសហរដ្ឋអាមេរិក។ លើសពីនោះ លោកក៏កំពុងតែដើរតាមក្តីស្រមៃក្នុងវិថីសិល្បៈលើឆាកអន្តរជាតិ ដោយបច្ចុប្បន្ន លោកក៏បានប្តូរឈ្មោះលើវិថីសិល្បៈហៅថា N.John ទៀតផង។
ជាក់ស្តែង ក្រោយបានចាកចេញទៅរស់នៅសហរដ្ឋអាមេរិក និង សិក្សាផ្នែករាំ ព្រមទាំងច្រៀងនៅឯ Millennium Dance Complex នៅរដ្ឋ Los Angeles នោះ លោក N.John ក៏បានបង្ហាញសមិទ្ធផលថ្មីហើយ ដោយលោកបានចេញ Album ចម្រៀងទោលរួចរាល់ដែរ។ ម្យ៉ាងវិញទៀត ថ្មីៗនេះ លោកក៏ទទួលបាន O-1B visa ដែលជាទិដ្ឋាការស្របច្បាប់ក្នុងនាមជាសិល្បករនៅសហរដ្ឋអាមេរិក បន្ទាប់ពីលោកទទួលបានជោគជ័យខ្ពស់ និង ការទទួលស្គាល់ក្នុងការខិតខំប្រឹងប្រែងច្នៃប្រឌិតនៃសិល្បៈរបស់លោកនៅទីនោះ។
ងាកមកកាន់ការផលិតបទចម្រៀងនៅលើទឹកដីសហរដ្ឋអាមេរិកឯណោះវិញ លោក N.John ទទួលបានការគាំទ្រ និង មតិរិះគន់ព្រមគ្នា ខណៈមានអ្នកខ្លះសរសើរពីសមត្ថភាពរបស់លោកលើឆាកអន្តរជាតិ និង ខ្លះទៀតបញ្ចេញមតិតាមការយល់ឃើញរបស់ពួកគេរៀងៗខ្លួន។ ជាពិសេសនោះ គឺមួយរយៈក្រោយនេះ លោក N.John ត្រូវមហាជនជាច្រើនរិះគន់មិនពេញចិត្ត ព្រោះលោកបញ្ចេញចម្រៀងនេះខុសពេលវេលា ខណៈប្រទេសជាតិកំពុងមានបញ្ហាសង្គ្រាមដោយសារការឈ្លានពានរបស់ថៃ។
យ៉ាងណាក៏ដោយ ក៏មានមហាជន និង អ្នកសិល្បៈជាច្រើនបានចេញមកបញ្ចេញមតិ និង លើកហេតុផលថាអ្វីដែល N.John កំពុងធ្វើឡើង ដើម្បីមុខមាត់ប្រទេសជាតិ លើកស្ទួយសិល្បៈកម្ពុជាឈានទៅទូទាំងពិភពលោកឱ្យបានស្គាល់ Cambodia ខណៈលោក កំពុងស្ថិតក្នុងទ្រនំរបស់វិស័យតន្ត្រីអន្តរជាតិ។ លើសពីនោះ រាល់ការបង្ហោះរបស់លោក ក៏មានការគ្រប់គ្រងពីបរទេសដែរ ដូច្នេះហើយការផុស គឺត្រូវធ្វើតាមការរៀបចំរបស់ក្រុមហ៊ុន។
ជាក់ស្តែង កាលពីថ្ងៃទី ១៨ ខែសីហា ឆ្នាំ ២០២៥ កន្លងទៅនេះ MV «Sweet Love» របស់លោក N.John ដែលបានបកស្រាយនឹងតារាចម្រៀងបរទេស Ebenezer បានចេញជាផ្លូវការហើយ ដោយក្រោយជួបព្យុះរិះគន់មួយរយៈពេលខ្លី កូនប្រុសទី ២ ឧកញ៉ា ព្រាប សុវត្ថិ រូបនេះ បានទទួលការសាទរ និង សរសើរពីស្នាដៃរបស់លោកលើឆាកអន្តរជាតិក្នុងនាមជាកូនខ្មែរហើយ៕
សូមចុចទីនេះ ដើម្បីទស្សនាវីដេអូ៖
