ជុំវិញរឿងរ៉ាវរបស់តារាស្រីល្បីឈ្មោះ ស៊ីន យូប៊ីន មហាជនលើបណ្ដាញសង្គមសុទ្ធសឹងបានជ្រាបហើយ កាលអំឡុងពេលប្រទេសកំពុងរងការឈ្លានពាន នាងក៏ទទួលរងការវែកញែក និង រិះគន់មិនពេញចិត្តខ្លាំង ពាក់ព័ន្ធនឹងភាពស្ងប់ស្ងាត់របស់នាងនៅលើហ្វេសប៊ុក។
យ៉ាងណាមិញ ស្របពេលផ្ទុះការវែកញែកជុំវិញរឿងអសកម្មលើហ្វេសប៊ុក និង យឺតយ៉ាវក្នុងការប្រើសំឡេងផ្សព្វផ្សាយតតាំងប្រឆាំងនឹងការឈ្លានពានរបស់ថៃមែន តែតារាស្រី ស៊ីន យូប៊ីន ក៏ត្រូវបានគេឃើញថា នាងបានចូលរួមចំណែកជាមួយសិល្បករដទៃក្នុងការជួយជាជំនួយដល់ជនរងគ្រោះនៅតំបន់ផ្សេងៗតាំងពីថ្ងៃដំបូងផងដែរ។
លើសពីនេះ ស៊ីន យូប៊ីន ក៏ធ្លាប់រៀបរាប់ប្រាប់ក្នុងកម្មវិធីកិច្ចសម្ភាសឱ្យដឹងថា អំឡុងពេលថ្ងៃដំបូងៗដែលកម្ពុជារងការឈ្លានពាន និង មានការភៀសសឹករបស់បងប្អូន នាង និង លោក វៃហាំង ក៏បានគិតតែបញ្ហាចំពោះមុខជាមុន និង ចំណាយថវិកាផ្ទាល់ខ្លួន រៀបចំនូវស្បៀង សម្ភារៈផ្សេងៗដើម្បីចុះទៅជួយជនរងគ្រោះបន្ទាន់ភ្លាមៗ ដោយពុំទាន់មានពេលស្នើសុំជំនួយពីស្ថាប័ន ឬបងប្អូនមហាជនលើបណ្ដាញសង្គមឡើយ។
ដោយឡែក មកដល់ថ្មីៗនេះ ក៏បានឃើញវីដេអូកិច្ចសម្ភាសមួយទៀត ដែលកញ្ញា ស៊ីន យូប៊ីន បានរៀបរាប់ជុំវិញរឿងខាងលើបន្ថែម ដោយនាងបានបង្ហាញពីអារម្មណ៍ពិត ក្រោយពីរងការវាយប្រហារ និង ប្រមាថដាក់បណ្ដាសាដល់អាយុជីវិតរបស់នាងពីមនុស្សមួយចំនួន ដែលពេលនោះនាងពិតជាមិនអាចទទួលយកបាន ប៉ុន្តែនាងក៏នៅតែតាំងចិត្តធ្វើអ្វីដែលខ្លួនធ្វើឱ្យអស់ពីលទ្ធភាព ហើយនាងក៏មិនមានគំនិតក្បត់នឹងមនសិការខ្លួនឯង ដោយនៅតែជឿលើភាពត្រឹមត្រូវ និង បាបបុណ្យ៕
សូមចុចទីនេះដើម្បីទស្សនាវីដេអូ៖
