ក្រោយពី Poster និង ចម្រៀងផ្លូវការបទ «Asian State Of Mind» បានចេញ ពេលនេះ MV បទចម្រៀងដែលមានការសហការណ៍រួមគ្នារវាងកំពូលតារាចម្រៀងរ៉េបទាំង ៥ នៅ អាស៊ី រួមមានតារាចម្រៀងរ៉េបជប៉ុន Awich, តារាចម្រៀងរ៉េបកូរ៉េ Jay Park, តារាចម្រៀងរ៉េបកូរ៉េ-ឥណ្ឌា KR$NA និង តារាចម្រៀងរ៉េបចិន Masiwei ក៏បានចេញជាផ្លូវការរួចរាល់ហើយដែរ កាលពីថ្ងៃទី ២៨ ខែកុម្ភៈ ឆ្នាំ ២០២៥ កន្លងទៅ។
ក្នុងនោះដែរ កំពូលតារាចម្រៀងរ៉េបប្រចាំប្រទេសកម្ពុជា លោក វណ្ណដា បានធ្វើឱ្យប្រជាជនកម្ពុជាមានមោទកភាពជាថ្មី ដោយក្នុង MV បទនេះ លោកបានបកស្រាយជាភាសាខ្មែរ និង រួមបញ្ជូលនូវការបង្ហាញអរិយធម៌ វប្បធម៌បុរាណខ្មែរជាច្រើន ដោយមានទាំងប្រាសាទមួយចំនួនលើទឹកដីខេត្តសៀមរាប។ មិនត្រឹមតែប៉ុណ្ណោះ វណ្ណដា ក៏បានច្របាច់បញ្ជូលឧបករណ៍តន្ត្រីខ្មែរក្នុងភ្លេង ដែលជាស្នាដៃរបស់លោក វណ្ណថាន ផងដែរ។
ក្រោយ MV «Asian State Of Mind» លោក វណ្ណដា ក៏បានបង្ហោះសាររៀបរាប់ថា ៖ «នេះជាកិត្តិយសធំបំផុតរបស់ខ្ញុំ ដែលអាចតំណាងឱ្យប្រទេស សិល្បៈ វប្បធម៌ និង ប្រជាជនខ្មែរទាំងអស់ក្នុងបទ «Asian State Of Mind» ជាមួយកំពូលតារាចម្រៀងរ៉េប ៤ រូបរួមមាន Awich, Jay Park, KR$NA, Masiwei។ សម្រាប់ខ្ញុំ បទ «Asian State Of Mind» ជាស្ពានតន្ត្រីមួយ ដែលភ្ជាប់ទំនាក់ទំនងរវាងប្រជាជន និង ចែករំលែកវប្បធម៌ទៅកាន់អ្នកស្តាប់មកពីគ្រប់ទីកន្លែង ឱ្យកាន់តែស្គាល់ពាក្យថា «ខ្មែរ» និង ទីកន្លែងអច្ឆរិយរបស់ប្រទេសកម្ពុជា។ ខ្ញុំជឿថាឥឡូវនេះ ជាពេលវេលាដែលប្រទេសនានានៅក្នុងតំបន់អាស៊ីត្រូវរួបរួមគ្នា ដើម្បីផលិតអ្វីថ្មីៗ ដែលកាន់តែអស្ចារ្យថែមទៀត នេះជាវេនរបស់អាស៊ីយើង»៕
សូមចុចទីនេះ ដើម្បីទស្សនាវីដេអូ៖
