បើគិតមកដល់ពេលនេះរយៈពេលជិត ១ ឆ្នាំ មកហើយ នៃការបង្ហាញពីទំនាក់ទំនងលើសពីមិត្តរួមប្រកួតរវាងកញ្ញា ម៉ាលីន និង លោក ដាឡែត បេក្ខភាពឆ្នើម MasterChef Cambodia រដូវកាលទី ៣ បន្ទាប់ពីមានទំនាក់ទំនងស្នេហាអំឡុងពេលប្រកួត។
ក្រោយពីបង្ហើបពីទំនាក់ទំនងយ៉ាងច្បាស់លាស់ហើយនោះ អ្នកគាំទ្រសង្កេតឃើញ គូស្នេហ៍ចុងភៅមួយគូនេះ កាន់តែបង្ហាញភាពផ្អែមល្ហែមជារឿយៗ បើទោះម្នាក់ៗរស់នៅឆ្ងាយពីគ្នា ដោយកញ្ញា ម៉ាលីន នៅខេត្តកំពត និង លោក ដាឡែត នៅខេត្តពោធិ៍សាត់។
ជាការពិតណាស់ បើនិយាយពីរឿងចាស់ទុំឯណោះវិញ គឺក្រុមគ្រួសាររបស់កញ្ញា ម៉ាលីន និង លោក ដាឡែត បានដឹងឮចំណងស្នេហ៍របស់កូនៗដូចគ្នា ដោយក្នុងនោះ គេក៏តែងឃើញកញ្ញា ម៉ាលីន ទៅលេងអ្នកម្តាយលោក ដាឡែត នៅខេត្តពោធិ៍សាត់ រីឯលោក ដាឡែត ក៏មកខេត្តកំពតជួបគ្រួសារកញ្ញា ម៉ាលីន និង ជួយមើលរបររកស៊ីរបស់កញ្ញា ម៉ាលីន ដែលបើកផ្ទះលម្ហែដូចគ្នាដែរ។
ដោយឡែកនៅថ្ងៃកំណើតរបស់កញ្ញា ម៉ាលីន អ្នកគាំទ្របានឃើញកំលោះមុខស្មើលោក ដាឡែត បានបង្ហោះសារជូនពរថ្ងៃកំណើតមិត្តស្រី និង រៀបចំកាដូឱ្យកញ្ញា ម៉ាលីន តាំងពីខែមុនមកម្ល៉េះ។ សារនោះលោក ដាឡែត បានរៀបរាប់ជាភាសាអង់គ្លេស និង មានអត្ថន័យថា៖ «បងសុំទោស សម្រាប់ការយឺតយ៉ាវក្នុងថ្ងៃកំណើតអូន ប៉ុន្តែបងបានរៀបចំកាដូតាំងពីខែមុនមកម្ល៉េះ។ បងអត់ដឹងថាត្រូវ surprise យ៉ាងម៉េច ប៉ុន្តែបងសង្ឃឹមថាអូននឹងចូលចិត្តវាក្មេងតូច»៕
សូមចុចទីនេះ ដើម្បីទស្សនាវីដេអូ៖
