កាលពីថ្ងៃទី ២១ ខែមេសា ឆ្នាំ ២០២៥ កន្លងទៅ បវរកញ្ញាភេទទី ៣ Miss Queen Cambodia 2023 កញ្ញា ម៉ៃយ៉ា បានបង្ហោះរូបភាពប៉ុន្មានសន្លឹក បង្ហាញពីស្ថានភាពច្រមុះហើមខ្លាំងនៅលើគណនីហ្វេសប៊ុក ធ្វើឱ្យអ្នកគាំទ្រមានការបារម្ភជាខ្លាំង។
ក្នុងនោះ រូបភាពអមបង្ហាញពីច្រមុះហើមខ្លាំងនោះដែរ កញ្ញា ម៉ៃយ៉ា ក៏បានអមនូវសារមួយឃ្លាថា៖ «ចូលឆ្នាំហើយ ម្នាក់ៗគេខូចទូរស័ព្ទ ចំណែកខ្ញុំខូចច្រមុះ» ដោយប៉ះពាល់ ពីការលេងប៉ាតម្សៅនៅថ្ងៃបុណ្យចូលឆ្នាំខ្មែរ។
ដោយឡែក ក្រោយបង្ហោះសារ និង រូបភាពប៉ះពាល់ច្រមុះ ហើមខ្លាំងនោះ នៅថ្ងៃទី ២៣ ខែមេសា ឆ្នាំ ២០២៥ នេះ កញ្ញា ម៉ៃយ៉ា បានចេញមកបញ្ជាក់មូលហេតុយ៉ាងច្បាស់ ថាដើមហេតុបែបណា បានជាលេងប៉ាតម្សៅដល់ថ្នាក់ប៉ះពាល់ខូចច្រមុះ ដែលនាងបានកែកុននោះ។
MQC 2023 កញ្ញា ម៉ៃយ៉ា បានឱ្យដឹងថា នាងបានប៉ះពាល់ហើមច្រមុះ ដោយការលេងបាតម្សៅតាំងពីថ្ងៃចូលឆ្នាំថ្ងៃទី ១ មកម្ល៉េះ ប៉ុន្តែគិតថា វាមិនអី តែក្រោយចូលឆ្នាំរួចក៏ហើមកាន់តែខ្លាំង។ ម៉ៃយ៉ា បញ្ជាក់ថា៖ «មានអ្នកគេលេងប៉ាតម្សៅ សុំត្រឹមត្រូវមិនជាបញ្ហានោះឡើយ តែមានអ្នកខ្លះមកលួចប៉ាតម្សៅពីក្រោយខ្នង ដោយខ្លះប៉ាតម្សៅយកដៃសោយច្រមុះនាងឡើង និង ខ្លះទៀតមកច្បូតច្រមុះ ញីមុខ ដែលជាហេតុឱ្យមានបញ្ហារហូតដកខ្ទង់ច្រមុះចេញ»។
ក្នុងនោះ កញ្ញា ម៉ៃយ៉ា ក៏បានសំណូមពរ និង ប្រាប់ជាបទពិសោធសម្រាប់ពេលក្រោយៗថា សុំកុំឱ្យមានការលេងបែបនេះទៀតអី ព្រោះមិនថាតែអ្នកធ្វើច្រមុះទេ សូម្បីអ្នកមានច្រមុះធម្មជាតិ ក៏មានបញ្ហាដូចគ្នាដែរ៕
សូមចុចទីនេះ ដើម្បីទស្សនាវីដេអូ៖
