ស្របពេលកម្មវិធីប្រកាសរកឃើញម្ចាស់មកុដថ្មី Miss Universe Cambodia 2025 បានទៅលើបវរកញ្ញា ថៃ នារីសុជាតា ឃើញថាក្រៅពីមហាជនអ្នកគាំទ្រវិស័យបវរកញ្ញាលើបណ្ដាញសង្គមចែកបង្ហាញអបអរដោយក្ដីពេញចិត្ត ក៏ឃើញមានអ្នកសិល្បៈ ក៏ដូចជារៀមច្បងក្នុងវិស័យបវរកញ្ញាជាច្រើន បានចូលរួមអបអរសាទរយ៉ាងរំភើបចំពោះម្ចាស់ជ័យលាភីរូបនេះដែរ។
ក្នុងនោះ ងាកមើលហ្វេសប៊ុករបស់បវរកញ្ញា ប៊ី សុធារី ក៏បានឃើញនាងបង្ហោះវីដេអូមួយជាមួយបវរកញ្ញា អ៊ិន លក្ខិណា ដែលបានថតក្នុងរាត្រីនៃការប្រកាសលទ្ធផលប្រកួត MUC 2025 ដែលអ្នកទាំងពីរ បានស្រែកហ៊ោអបអរដោយក្ដីរំភើបខ្លាំង ពេលកម្មវិធីប្រកាសថាអ្នកនាង ហ្វីយ៉ាតា ក្លាយជាម្ចាស់មកុដថ្មីនៃ MUC 2025។
ដោយឡែក ចំពោះវីដេអូនៃការស្រែកហ៊ោអបអររបស់កញ្ញា ប៊ី សុធារី និង កញ្ញា អ៊ិន លក្ខិណា ត្រូវបានមហាជនចែករំលែក និង បញ្ចេញមតិដោយឃើញមានការវែកញែកខ្លះៗ ព្រមទាំងមានអ្នកចោទជាសំណួរដល់អ្នកទាំងពីរ ថាហេតុអីបានអបអរគាំទ្រតែបវរកញ្ញា ហ្វីយ៉ាតា ទៀតផង។
ក្រោយមានការវែកញែកខ្លាំងជុំវិញវីដេអូនេះ ក៏បានឃើញបវរកញ្ញា ប៊ី សុធារី ចេញនិយាយបកស្រាយទៅកាន់មហាជនចំពោះមតិវែកញែកផ្សេងៗ ដោយបានរៀបរាប់ឱ្យដឹងថាចំពោះការអបអរដល់បវរកញ្ញ ហ្វីយ៉ាតា ដោយសារតែនាងបានស្គាល់រាប់អានគ្នាយូរឆ្នាំមកហើយ ព្រមទាំង នាងក៏ជាអ្នកលើកទឹកចិត្តឱ្យបងស្រីចូលប្រកួតបវរកញ្ញាទៀតផង រីឯសម្រាប់បងស្រី Kon Ant គឺកន្លងមកនាងពុំធ្លាប់ជួប ឬស្គាល់រាប់អានគ្នាពីមុនឡើយ ដូចនេះទើបក្នុងពេលវគ្គកាន់ដៃនោះ នាង និង អ៊ិន លក្ខិណា ក៏បានធ្វើការអបអរសាទរដល់បងស្រី ហ្វីយ៉ាតា ក្រោយប្រកាសជាម្ចាស់មកុដ។
លើសពីនេះ ប៊ី សុធារី ក៏បានលើកនិយាយពីកញ្ញា ពេជ្រ វត្តីសារ៉ាវឌ្ឍី ដែរ ដោយនាងបានបញ្ជាក់ថាភ្លាមៗនោះ នាងក៏សោកស្ដាយពេលឃើញ វត្តី មិនបានកាន់ដៃវគ្គប្រកាសលទ្ធផលដូចការរំពឹងទុករបស់នាង ទើបក្នុងឱកាសនោះ នាង និង អ៊ិន លក្ខិណា ងាកមកត្រៀមដើម្បីអបអរដល់បងស្រី ហ្វីយ៉ាតា ដែលចាត់ទុកជាអ្នករាប់អានស្និទ្ធស្នាលមួយរូបក្នុងវិស័យនេះផងដែរ៕
សូមចុចទីនេះដើម្បីទស្សនាវីដេអូ៖
សូមចុចទីនេះដើម្បីទស្សនាវីដេអូ៖
សូមចុចទីនេះដើម្បីទស្សនាវីដេអូ៖
