មកដល់ពេលនេះ ទង្វើនៃការឈ្លានពានរបស់ថៃមកលើកម្ពុជា នៅតែដក់ជាប់ក្នុងចិត្តប្រជាជនកម្ពុជា ចងចាំទុកពេញដោយក្ដីឈឺចាប់ ដែលបាត់បង់នូវវីរកងទ័ពពលីជីវិតការពារមាតុភូមិ បងប្អូនគ្រួសារតាមព្រំដែនរងទុក្ខលំបាកត្រូវឃ្លាតឆ្ងាយពីផ្ទះសម្បែង និង បានបាត់បង់សមាជិកគ្រួសារ ប្រពន្ធព្រាត់ប្ដី កូនព្រាត់ឪពុកជាទីស្រឡាញ់។
អ្វីដែលកាន់តែធ្វើឱ្យមហាជនកម្ពុជា ជាពិសេសគ្រួសារវីរកងទ័ពមានក្ដីបារម្ភខ្លាំង ចំពោះវីរកងទ័ពកម្ពុជាដែលត្រូវបានទាហានថៃចាប់ខ្លួនដោយខុសច្បាប់ និង មិនទាន់ដោះលែងមកកម្ពុជាវិញ គិតមកដល់ពេលនេះ រយៈពេល ៤២ ថ្ងៃហើយ។
យ៉ាងណាមិញ មកដល់ថ្ងៃទី ៨ ខែកញ្ញា ឆ្នាំ ២០២៥ ជាពិធីកាន់បិណ្ឌ ១ នៃពិធីបុណ្យភ្ជុំបិណ្ឌប្រពៃណីជាតិខ្មែរ ក៏បានឃើញកំពូលតារាចម្រៀងស្រី ២ រូប គឺអ្នកនាង សុគន្ធ និសា និង អ្នកនាង ពេជ្រ សោភា ចេញចម្រៀងភ្ជុំបិណ្ឌដែលបង្ហាញពីក្ដីនឹករឭក និង ការឈឺចាប់របស់គ្រួសារនៃវីរកងទ័ព ខណៈជាពេលបងប្អូនខ្មែរជួបជុំគ្រួសារអបអរពិធីបុណ្យ ប៉ុន្តែសម្រាប់គ្រួសារកងទ័ពបានត្រឹមនឹករឭកមិនអាចជួបជុំដូចរាល់ឆ្នាំ។
ក្នុងនោះ អ្នកនាង សុគន្ធ និសា បានចេញចម្រៀងមួយបទ «ចង្ហាន់បាត់គូ» ដែលមានអត្ថន័យបង្ហាញពីក្ដីឈឺចាប់ និង ចិត្តនឹកអាល័យរបស់ភរិយាវីរកងទ័ពពលី ដែលភ្ជុំបិណ្ឌឆ្នាំនេះ សល់ត្រឹមតែរូបថតស្វាមី គ្មានថ្ងៃបានដាក់បិណ្ឌរួមគ្នាទៀត។ រីឯអ្នកនាង ពេជ្រ សោភា ក៏បានចេញចម្រៀងមួយបទ «រាប់ថ្ងៃចាំបង» ដែលមានអត្ថន័យពីវីរកងទ័ពដែលត្រូវបានចាប់ខ្លួនទៅជាច្រើនថ្ងៃ មិនទាន់ដោះលែងមកជួបប្រពន្ធកូនវិញ ដោយធ្វើឱ្យក្រុមគ្រួសារ ភរិយា កូន ទន្ទឹងរងចាំរាល់ថ្ងៃ មានតែក្ដីនឹករឭក និង បារម្ភ៕
សូមចុចទីនេះដើម្បីទស្សនាវីដេអូ៖
សូមចុចទីនេះដើម្បីទស្សនាវីដេអូ៖
