បើទោះជាបានបញ្ចាំងជាច្រើនសប្តាហ៍ហើយក្តី តែភាពយន្តខ្នាតធំខ្មែរ រឿង «ភ្លើងឆេះក្លឹបក្រោមដី» របស់ផលិតកម្ម LD នៅតែទទួលបានការគាំទ្រ និង ទស្សនាពីមហាជនកាន់តែច្រើនឡើង ដោយសារសាច់រឿងល្អមើល និង បានដកស្រង់ចេញពីរឿងពិតមួយរបស់គ្រួសារមួយនៅខេត្តសៀមរាប។
បើនិយាយពីសាច់រឿង និង ការសម្តែងរបស់តួអង្គៗក្នុងភាពយន្ត គឺសុទ្ធសឹងតែទទួលបានការចាប់អារម្មណ៍ និង សរសើរមិនដាច់ពីមាត់ពីអ្នកទស្សនា។ ជាពិសេសនោះ គឺតួអង្គឈ្មោះ ពិសី ដែលជាតួអង្គត្រូវបានព្រាយចូលសណ្ឋិត ដែលសម្តែងដោយកញ្ញា ជា សោភា ធីតាឯកសង្រ្កាន្តរងទី ១ រដូវកាលទី ៣ តំណាងជាតួទេពធីតាមួយអង្គក្នុងឆ្នាំ ២០២២ កន្លងទៅ។
យ៉ាងណាមិញ ថ្មីៗនេះ ក្រោយពីបានសម្តែងជាតួអង្គ ពិសី ក្នុងភាពយន្ត «ភ្លើងឆេះក្លឹបក្រោមដី» អស់ជាច្រើនខែហើយនោះ ស្រាប់តែកញ្ញា ជា សោភា បានចេញមកបង្ហាញអារម្មណ៍ថា មានរឿងប្លែកៗកើតឡើង បន្ទាប់ពីនាងបានទៅចូលរួមបុណ្យគម្រប់ ៣ ឆ្នាំ របស់លោក ឈឿន សំណាង កាលពីពេលកន្លងទៅ។
កញ្ញា ជា សោភា តួអង្គ ពិសី បានឱ្យដឹងថា ៖ «នាងជាមនុស្សមិនដែលចេះខ្លាចទេ ហើយពេលគេងក៏មិនដែលបើកភ្លើងដែរ តែមួយរយៈក្រោយនេះ នាងគេងទាល់តែបើកភ្លើង និង មានអ្នកមកគេងជាមួយ តែក្រោយពីនាងបានទៅបុណ្យគម្រប់ ៣ ឆ្នាំ របស់លោក ឈឿន សំណាង បានជួបតួអ៊ំ ថាន់ ពិត ដែលជាអ៊ំស្រីមើលដឹងពីរឿងផ្លូវងងឹត និង ជាអ៊ំរបស់លោក ឈឿន សំណាង បានយកខ្សែអំបោះមកពាក់ឱ្យនាង និង ប្រាប់ប្រយ័ត្នខ្លួន»។
តួអង្គ ពិសី បន្តថា ៖ «ពេលនោះ នាងក៏មានអារម្មណ៍ប្លែក ព្រោះនាងបានគេងយល់សប្តិអាក្រក់ គេងយល់សប្តិឃើញមនុស្សប្រុសម្នាក់សុទ្ធតែភក់ ដូចប្រឡាក់ឈាម មកសុំគេងជាមួយ ហើយញញឹមដាក់នាង តែក្នុងយល់សប្តិ នាងក៏ប្រាប់ឱ្យបុរសនោះទៅងូតទឹក តែបុរសនោះឆ្លើយថាអត់ដែលងូតទឹកផង សុំមកគេងជិតហែង។ លើសពីនោះ យប់មួយទៀតនាងក៏បានយល់សប្តិចម្លែកម្តងទៀត! នាងជាមនុស្សអត់ចេះហែលទឹកទេ ខ្លាចទាំងក្នុងជីវិតពិត និង យល់សប្តិក៏ខ្លាច តែដល់យប់មុននាងយល់សប្តិ ឃើញមនុស្សជាច្រើនឱ្យនាងចូលទឹក ហើយចាប់ផ្តើមមានអារម្មណ៍ប្លែកៗ»៕
សូមចុចទីនេះ ដើម្បីទស្សនាវីដេូ៖
