ពិតណាស់ ក្នុងកម្មវិធីប្រគំតន្រ្តី Solo Concert លើកដំបូងរបស់តារាចម្រៀងស្រីរូបស្រស់ ពេជ្រ សូលីកា កាលរាត្រីថ្ងៃទី ២២ ខែកុម្ភៈ ឆ្នាំ ២០២៤ កន្លងទៅនេះ ក្រៅពីបកស្រាយចម្រៀងពីរោះៗ និង សម្ដែងទស្សនីយភាពពិសេសពីតារាចម្រៀងស្រីរូបនេះហើយនោះ អ្វីកាន់តែធ្វើឱ្យអ្នកគាំទ្រចាប់អារម្មណ៍ក្រោយឃើញវត្តមានរបស់តារាចម្រៀងរៀមច្បង អ្នកនាង យក់ ថិតរដ្ឋា ជាតារាចម្រៀងកិត្តិយសក្នុងកម្មវិធីនេះ។
វត្តមានជាតារាចម្រៀងកិត្តិយសក្នុងកម្មវិធី Solo Concert របស់តារាចម្រៀង ពេជ្រ សូលីកា នេះដែរ អ្នកនាង យក់ ឋិតរដ្ឋា បានលើកយកចម្រៀងរបស់ខ្លួនប៉ុន្មានបទបកស្រាយរួមគ្នាជាមួយម្ចាស់កម្មវិធី ដែលធ្វើឱ្យអ្នកគាំទ្ររំភើបស្រែកហ៊ោពេញសាលប្រគំតន្រ្តីផងដែរ។
លើសពីនេះ អ្វីកាន់តែចាប់អារម្មណ៍ បន្ទាប់ពីបកស្រាយចម្រៀងចប់ ពេជ្រ សូលីកា បានធ្វើឱ្យរៀមច្បង យក់ ឋិតរដ្ឋា រំភើបរហូតស្រក់ទឹកភ្នែក ខណៈនាងនិយាយពីមូលហេតុដែលសម្រេចចិត្តអញ្ជើញរៀមច្បងរូបនេះជាតារាចម្រៀងកិត្តិយសក្នុងកម្មវិធីរបស់ខ្លួន ព្រោះតែរៀមច្បងរូបនេះជាអាយដលក្នុងចិត្តរបស់នាងតាំងពីក្មេងៗ ចូលចិត្តស្ដាប់ចម្រៀង និង ច្រៀងតាមអាយដល ដែលនេះជាឱកាសដ៏ល្អសម្រាប់នាងអាចអញ្ជើញអាយដលមក និង បង្ហាញការគោរពស្រឡាញ់ក្នុងនាមអ្នកគាំទ្រម្នាក់៕
សូមចុចទីនេះដើម្បីទស្សនាវីដេអូ៖
