កាលពីយប់ថ្ងៃទី ១៨ ខែមិថុនា ឆ្នាំ ២០២៥ កន្លងទៅនេះ អ្នកគាំទ្រ ក៏ដូចជាមិត្តទាំងក្នុង ក្រៅរង្វង់សិល្បៈរបស់តារាស្រី ពេជ្រ ចរណៃ មានការរន្ធត់ចិត្តយ៉ាងខ្លាំង ក្រោយទទួលដំណឹងថាហាងរបស់នាងបានភ្លើងឆាបឆេះកាលពីវេលាម៉ោង ៨ និង ៤៥ នាទី យប់។
ក្នុងនោះ ហាងរបស់ កញ្ញា ពេជ្រ ចរណៃ ដែលត្រូវបានភ្លើងឆាបឆេះអស់ទាំងស្រុងនោះដែរ គឺជាហាងអាហារ ដែលនាងកំពុងរៀបចំ និង ត្រៀមបើកដំណើរការនាចុងខែមិថុនា ឆ្នាំ ២០២៥ ខាងមុខនេះ។ យ៉ាងណាមិញ ជាអកុសល ហាងដែលជាក្តីស្រមៃកើតចេញពីកម្លាំងញើសឈាមមួយនេះត្រូវរលាយអស់មួយរំពេចព្រោះតែអំណាចភ្លើង។
ចំពោះហាងរបស់តារាស្រីរូបនេះ ត្រូវបានគេដឹងថាជាហាងថ្មីដែលនាងទើបតែរៀបចំរួច និង ត្រៀមសម្ភោធដំណើរការ ដែលមានចែកជា ៣ ផ្នែក មានអាហារដ្ឋានម្ហូបកម្ម៉ង់បែបខ្មែរ កាហ្វេល្បុក្កតោខ្មែរ និង ជាកន្លែងបង្ហាត់ក្បាច់គុនបុរាណខ្មែរផងដែរ។
ក្រោយហាងត្រូវឆាបឆេះទាំងស្រុងហើយនោះ នៅរសៀលថ្ងៃទី ១៩ ខែមិថុនា ឆ្នាំ ២០២៥ នេះ កញ្ញា ពេជ្រ ចរណៃ បានចេញមកជម្រាបជូនមហាជនពីមូលហេតុនៃការបង្កឱ្យហាងឆាបឆេះលឿនត្រឹម ១ ប៉ប្រិចភ្នែកត្រឹមរយៈពេល ១០ នាទីក៏ឆេះអស់ខ្ទេចខ្ទី។ លើសពីនោះ កញ្ញា ក៏សុំពេលដល់ម្ចាស់ផ្ទះជួល ក្នុងការជួសជុលហាងឡើងវិញឱ្យដូចដើមដែរ៕
សូមចុចទីនេះ ដើម្បីទស្សនាវីដេអូលម្អិត៖
