ថ្មីៗនេះ អ្នកលេងបណ្តាញសង្គមហ្វេសប៊ុក បាន និង កំពុងចាប់អារម្មណ៍នូវវីដេអូមួយរបស់ជំទាវ ចន ច័ន្ទលក្ខិណា បានបង្ហោះនូវសារឆ្លងឆ្លើយរវាងអតីតតារាសម្តែងជើងចាស់ល្បីឈ្មោះ លោក ចាន់រិទ្ធ មេធានី ដែលបានឆាតតាមតេឡេក្រាមសុំជំនួយពីលោកជំទាវ។
តាមរយៈវីដេអូនោះដែរ លោក ចាន់រិទ្ធ មេធានី បានផ្ញើសារជាសំឡេង សុំថវិកាចំនួន ១០ ម៉ឺនរៀល ពីជំទាវ ចន ច័ន្ទលក្ខិណា ដើម្បីទិញថ្នាំព្យាបាលជំងឺទឹកនោមផ្អែម ដែលជាជំងឺប្រចាំកាយ។ ក្នុងនោះ លោក ចាន់រិទ្ធ មេធានី បានហៅជំទាវ ចន ច័ន្ទលក្ខិណា ថា អ្នកម្តាយ និង សុំឱ្យជំទាវជួយផង ដោយសារលោកគ្មានប្រាក់ទេនៅពេលនេះ។
ដោយឡែក ងាកទៅកាន់ជំទាវ ចន ច័ន្ទលក្ខិណា វិញ ក៏បានអមនូវសំណេរនៃការបង្ហោះវីដេអូខាងលើនោះថា៖ «ហ៊ឺម បងអើយបង! បងព្យាយាមឆាតទៅពឹងគេ ផ្តាំតាមគេឱ្យជួយប្រាប់ប្អូន បងហៅខ្ញុំអ្នកម្តាយអ៊ីចឹង បាបប្អូនណាស់បង! ប្អូនជួយតាមលទ្ធភាព ព្រោះឥឡូវប្អូនត្រូវការប្រឹងរកស៊ី ដើម្បីជីវភាពផ្ទាល់ខ្លួន ប្អូនមិនអាចចេះតែជួយយកអាសាគេរហូត ភ្លេចជួយខ្លួនឯងដូចមុនទេ។ ប្អូនជូនពរបងឆាប់ជា និង មានសុខភាពល្អ កម្លាំងមាំមួន»។
គួររំឭកថា លោក ចាន់រិទ្ធ មេធានី គឺជាតារាសម្តែងជើងចាស់មួយរូប ដែលល្បីល្បាញកាលពីជំនាន់ជាមួយនឹងលោក ខៃ ប្រសិទ្ធ ប៉ុន្តែបច្ចុប្បន្នលោកបានចាកឆ្ងាយពីអាជីពសិល្បៈយូរមកហើយ ដោយមានរបរជាអ្នករត់តុកតុក។ លើសពីនោះ អ្វីដែលគួរឱ្យក្តុកក្តួល លោក ចាន់រិទ្ធ មេធានី ក៏មានជំងឺប្រចាំកាយ គឺជំងឺទឹកនោមផ្អែម ព្រមទាំងមានជីវភាពខ្វះខាតទៀតផង៕
សុំចុចទីនេះ ដើម្បីទស្សនាវីដេអូ៖
