ចំពោះតារាស្រីរូបស្រស់កញ្ញា ព្រះកាយ ច័ន្ទ បច្ចុប្បន្នអាចចាត់ទុកជាតារាស្រីពហុជំនាញមួយរូបក្នុងវិស័យសិល្បៈ មានសមត្ថភាពខ្ពស់ទាំងវិស័យសម្ដែង ពិធីការិនី ចម្រៀង សិល្បៈបុរាណជាច្រើនទម្រង់ និង ជំនាញជាច្រើនទៀត ថែមទាំងធ្លាប់ប្រឡូកវិស័យបវរកញ្ញាទៀតផង។
យ៉ាងណា មួយរយៈក្រោយ ទាក់ទងនឹងវិស័យសម្ដែងភាពយន្ត តារាស្រីពហុជំនាញរូបនេះ ហាក់ស្ងប់ស្ងាត់មិនសូវឃើញវត្តមានសម្ដែងដូចពីមុនឡើយ រួមទាំងអាជីពជាពិធីការិនីផ្សេងៗ ប៉ុន្តែភាគច្រើននាងកំពុងផ្ដោតលើការងារបង្ហាត់បង្រៀនសិល្បៈបុរាណដល់ក្មេងៗ ដែលជាកូនសិស្សក្នុងក្លឹបរបស់នាង។
លើសពីនេះ កញ្ញា ព្រះកាយ ច័ន្ទ ក៏កំពុងធ្វើឱ្យមហាជនអ្នកគាំទ្រចាប់អារម្មណ៍ខ្លាំងជាមួយស្នាដៃ និង គំនិតថ្មីៗរបស់នាងលើបណ្ដាញសង្គម ដែលនាងចូលចិត្តផលិតវីដេអូបែបកំប្លែងៗសប្បាយៗប្លែកខុសកាលពីមុន។
ស្របពេលកំពុងបង្កើតមាតិកាថ្មីបែបកំប្លែងៗនេះដែរ ថ្មីៗនេះ ក៏បានឃើញតារាស្រី ព្រះកាយ ច័ន្ទ និយាយបកស្រាយក្នុងវីដេអូកិច្ចសម្ភាសមួយឱ្យដឹងថា កន្លងមកទាក់ទងនឹងវិស័យសិល្បៈផ្សេងៗ ទាំងសម័យ និង បុរាណ នាងធ្លាប់ធ្វើគ្រប់រសជាតិអស់ហើយ មិនថាវិស័យសម្ដែង បែបកម្សត់ទឹកភ្នែក មនោសញ្ចេតនា និង គំនិតល្អៗអប់រំផ្សេងៗ ប៉ុន្តែរសជាតិថ្មីមួយដែលនាងមិនធ្លាប់មាន គឺផ្ដល់នូវភាពសប្បាយរីករាយដល់អ្នកគាំទ្រ ដូចនេះទើបនាងសម្រេចចិត្តបង្កើតមតិកាថ្មីបែបសប្បាយៗតាម Trend លើបណ្ដាញសង្គមម្ដង៕
សូមចុចទីនេះដើម្បីទស្សនាវីដេអូ៖
