ដូចមហាជនបានជ្រាបមកហើយ ពីទេពកោសល្យរបស់ អ្នកនាង ខាត់ សុឃីម លើវិថីសិល្បៈ ដែលគេបានដាក់ងារអ្នកនាងថា ជាតារាស្រីពហុជំនាញ។ ក្នុងនោះ ទាំងចម្រៀងបុរាណ សម័យ ទាំងការសម្តែង ទាំងជាពិធីករ និង របាំ ក៏អ្នកនាង ខាត់ សុឃីម អាចធ្វើបាន។
ដោយឡែក ងាកទៅកាន់ការច្រៀងវិញនោះ កន្លងមក រៀមច្បង ខាត់ សុឃីម ធ្លាប់បានសហការណ៍នឹងតារាចម្រៀងប្រុសស្រីក្មេងចាស់ជាច្រើនរូបមកហើយ ដោយក្នុងនោះរួមមាន តារាចម្រៀងរ៉េបស្រករក្រោយទៀតផង។
ក្នុងនោះគេចាំបានថា កាលពីឆ្នាំ ២០២៣ អ្នកនាង ខាត់ សុឃីម បានបកស្រាយចម្រៀងរួមគ្នានឹងតារាចម្រៀងរ៉េប YCN Rakhie សមាជិក La Cima Cartel និង លោក វណ្ណថា គឺបទ «សមុទ្រស្នេហ៍» និង ឆ្នាំ ២០២៤ អ្នកនាង ខាត់ សុឃីម បានបកស្រាយចម្រៀងនឹងតារាចម្រៀងរ៉េប RuthKo គឺបទ «ស្រឡាញ់បងទៅអូន»។
យ៉ាងណាមិញ បទចម្រៀងបកស្រាយនឹងប្អូនៗជំនាន់ក្រោយចំនួន ២ បទខាងលើនេះ អ្នកនាង ខាត់ សុឃីម បានរក្សានូវទម្រង់ដើមរបស់អ្នកនាង គឺច្រៀងបែបប្រពៃណីប៉ុណ្ណោះ ប៉ុន្តែអ្វីដែលកាន់តែចាប់អារម្មណ៍ នៅឆ្នាំ ២០២៥ នេះ អ្នកនាង ខាត់ សុឃីម បានបញ្ចេញបទចម្រៀងរួមគ្នានឹងតារាចម្រៀងរ៉េប 1NE មានចំណងជើងថា «បោះសន្ទូចរំលងខេត្ត»។ ការបកស្រាយរួមនឹងសិស្សប្អូនលើកនេះ អ្នកនាង ខាត់ សុឃីម បានបង្ហាញរសជាតិថ្មី ដោយតារាស្រីពហុជំនាញរូបនេះ បង្ហើរឃ្លោងឃ្លាជាចង្វាក់រ៉េបយ៉ាងឡូយ៕
សូមចុចទីនេះ ដើម្បីទស្សនាវីដេអូ៖
