នៅរសៀលថ្ងៃទី ២៨ ខែមីនា ឆ្នាំ ២០២៥ នេះ មហាជនស្ទើរទូទាំងពិភពលោក កំពុងមានការភ្ញាក់ផ្អើលយ៉ាងខ្លាំង នូវហេតុការណ៍រញ្ជួយដីកម្រិត ៧.៧ វ៉ិចទ័រដែលកើតឡើងនៅប្រទេសមីយ៉ាន់ម៉ា និង កម្រិត ៧.៤ វ៉ិចទ័រនៅទីក្រុកបាងកក ប្រទេសថៃ បណ្ដាលឱ្យអគារជាច្រើនបាក់រលំស្ដែងៗ បង្កឱ្យមនុស្សរត់រកប្រាសអាយូសរៀងខ្លួន។
យ៉ាងណាមិញ ងាកមកប្រទេសកម្ពុជាយើងវិញ ដ្បិតថាមិនទាន់មានការចុះផ្សាយជាផ្លូវការណាមួយពីក្រសួង ឬស្ថាប័នពាក់ព័ន្ធ ប៉ុន្ដែមានការបង្ហោះវីដេអូ និង បញ្ចេញយោបល់ពីបណ្ដាប្រជាពលរដ្ឋដែលរស់នៅតាមបណ្ដាខេត្តមួយចំនួនដូចជា ខេត្តព្រះសីហនុ ខេត្តបាត់ដំបង ខេត្តកំពង់ធំ និង តំបន់មួយចំនួននៅរាជធានីភ្នំពេញ ក៏មានការផ្អើលឆោឡោថា មានអគាររង្គើៗផងដែរ។
តាមរយៈគណនីហ្វេសប៊ុកប្រជាពលរដ្ឋមួយរូបដែលរស់នៅស្រុកស្ទោង ខេត្តកំពង់ធំ បានបង្ហោះវីដេអូនៅម៉ោង ១ និង ៤២ នាទីរសៀលថ្ងៃទី ២៨ ខែមីនា ឆ្នាំ ២០២៥ នេះថា នៅតំបន់ដែលលោករស់នៅក៏មានការញ័ររង្គើៗ រញ្ជួយតិចៗដែរ ហើយហេតុការណ៍កម្រកើតឡើងនៅកម្ពុជានេះ ធ្វើឱ្យប្រជាពលរដ្ឋដែលរស់នៅម្ដុំនោះ មានការភ្ញាក់ផ្អើលជាខ្លាំង។ សូមចុចទីនេះ ដើម្បីទស្សនាវីដេអូ ៖
