កន្លងមក មហាជននិយមតាមដានបណ្តាញសង្គមច្បាស់ជាបានជ្រាបមកហើយ ពីប្អូនស្រីជនភៀសសឹកដែលចេះនិយាយ ៤ ភាសា តាមរយៈការរៀនតាមអនឡាញដោយខ្លួនឯង មានឈ្មោះហៅក្រៅថា Nelly បន្ទាប់ពីអ្នកផលិតមាតិកាល្បីម្ចាស់ Channel Youtube «China Mac Tv» ឈ្មោះ Raymond Yu ហៅ Mac បានទៅជួបរូបនាង និង បង្ហោះវីដេអូនោះ។ លើសពីនោះ លោក Mac ដែលជាអ្នកផលិតមាតិកា និង ជាបុគ្គលដំបូង ដែលធ្វើឱ្យ Nelly ផ្ទុះការចាប់អារម្មណ៍នោះ ក៏បានបង្កើតមូលនិធិស្វែងរកថវិកាជូននាងទៀតផង។
បន្ទាប់ពី វីដេអូរបស់ Mac បានចេញផ្សាយ និង មានការទស្សនាច្រើនទាំងក្នុង និង ក្រៅប្រទេសនោះ ធ្វើឱ្យមហាជន អាណិតស្រឡាញ់ និង សរសើរដល់ Nelly រហូតមានការជួយឧត្ថម្ភជាថវិកា ម៉ូតូ និង ឱ្យនាងបានសិក្សាបន្តដោយឥតគិតថ្លៃថែមទៀតផង។
យ៉ាងណាមិញ ក្រោយទទួលបានការអាណិតស្រឡាញ់ពីមហាជនហើយនោះ ថ្មីៗនេះ Nelly បានបង្ហោះវីដេអូអរគុណទៅដល់មនុស្សគ្រប់គ្នា ដែលបានជួយដល់រូបនាង ជាពិសេសនោះ គឺលោក Mac តែម្តង។ មិនត្រឹមតែប៉ុណ្ណោះ Nelly បានឱ្យដឹងថា ព្រោះតែអំពើល្អរបស់អ្នករាល់គ្នា នាងសង្ឃឹមអនាគតនាងនឹងល្អប្រសើរ។
Nelly បានរៀបរាប់ថា៖ «សូមអរគុណដល់ប្រជាជនកម្ពុជា ដែលបានផ្តល់ក្តីស្រឡាញ់ និង ការគាំទ្រ។ ខ្ញុំជាកូនស្រីខ្មែរម្នាក់ ដែលមានក្តីសង្ឃឹមថា អនាគតរបស់ខ្ញុំនឹងភ្លឺថ្លា ដោយសារក្តីល្អរបស់អ្នកទាំងអស់គ្នា»៕
សូមចុចទីនេះ ដើម្បីទស្សនាវីដេអូ៖
