ដូចមហាជនបានជ្រាបរួចមកហើយ ក្រោយពីមានការពហិកាក្នុងការមិនប្រើប្រាស់ផលិតផល និង នាំចូលពីប្រទេសថៃទៀតនោះ ប្រជាជនកម្ពុជាបាន និង កំពុងមកចាប់អារម្មណ៍នឹងផលិតផលក្នុងស្រុកដែលកំពុងមានលើទីផ្សារស្រាប់។
ម្យ៉ាងវិញទៀត ក្រឡេកទៅមើលអាជីវកម្មធំៗ និង អ្នកលក់អនឡាញធំៗ ដែលធ្លាប់វេចខ្ចប់ទំនិញ ឬ ផលិតនៅប្រទេសថៃនោះ ក៏បានផ្លាស់ប្តូរសង្វាក់នៃការផលិត ព្រមទាំងខ្លះត្រៀមបង្កើតរោងចក្រក្នុងស្រុកថែមទៀតផង។
ដោយឡែក ក្រឡេកទៅមើលលោក Rick KH ឯណោះវិញ ក៏ក្លាយជាកូនខ្មែរមួយរូប ដែលបានដាក់លក់នូវថ្នាំដុសធ្មេញជាផលិតផលកូនខ្មែរក្នុងប្រទេសកម្ពុជា ក្រោយពីស្រាវជ្រាវនៃការផលិត ដែលយកធាតុផ្សំពីប្រទេសនេប៉ាល់ប្រមាណជាង ១ ឆ្នាំ។ ក្នុងនោះ ស្នាដៃនៃការបង្កើតប្រេនថ្នាំដុសធ្មេញ «អំបិលហិមាល័យ» របស់លោក Rick KH ក៏បានចាប់ដៃគូសហការណ៍ជាមួយកូនខ្មែរកម្ពុជាក្រោម និង មិត្តភក្តិប្រមាណ ៧ នាក់។
លោក Rick KH ក៏បានឱ្យដឹងដែរថា ផលិតផលថ្នាំដុសធ្មេញ អំបិលហិមាល័យ មិនត្រឹមតែដាក់លក់នៅក្នុងប្រទេសកម្ពុជាទេ តែលោកបានទទួលប័ណ្ណសរសើរ និង វិញ្ញាបនបត្រនាំចេញ នាំចូលទៅលក់នៅឯសហរដ្ឋអាមេរិក និង ប្រទេសកូរ៉េផងដែរ។ លើសពីនោះ នៅចុងឆ្នាំនេះ លោកនឹងបង្កើនគុណភាពថ្នាំដុសធ្មេញរបស់លោក ព្រមទាំងបើកនូវសិប្បកម្មក្នុងប្រទេសផងដែរ៕
សូមចុចទីនេះ ដើម្បីទស្សនាវីដេអូ៖
