មហាជននិយមតាមដានជីវិតស្នេហារបស់ នាយព្រែក និង កញ្ញា ឈិន មុន្នីនាថ ច្បាស់ជាបានជ្រាបហើយ ក្រោយពីសាងចំណងស្នេហ៍ក្នុងនាមជាសង្សារអស់រយៈពេលប្រមាណជិត ៦ ឆ្នាំ ហើយនោះ ថ្មីៗនេះ នាយព្រែក បានលុតជង្គង់សុំកញ្ញា ឈិន មុន្នីនាថ រៀបការហើយ។ ក្នុងនោះដែរ ពិធីមង្គលការរបស់ នាយព្រែក និង កញ្ញា ឈិន មុន្នីនាថ នឹងរៀបចំឡើងនៅថ្ងៃទី ០៧ ខែធ្នូ ឆ្នាំ ២០២៥ ខាងមុខនេះ។
ទន្ទឹមនឹងថ្ងៃពិសេសខិតជិតចូលមកដល់ ក្រឡេកទៅមើលលោកឪពុករបស់ អនាគតកូនក្រមុំ គឺតារាជើងចាស់លោក ឈិន កុសល បានទម្លាយពីអារម្មណ៍ក្នុងនាមជាឪពុក ពេលកូនស្រីជិតរៀបការ ព្រមទាំងបានទម្លាយពីអារម្មណ៍ដំបូង ដែលកូនស្រី ទាក់ទងនឹង នាយព្រែក ទៀតផង។
ក្នុងវីដេអូ ជជែកជាមួយនឹង កញ្ញា ឈិន មុន្នីនាថ ជាកូនស្រី លោក ឈិន កុសល បានឱ្យដឹងថា លោករំភើប ដែលកូនស្រីជិតរៀបការ ព្រោះកូនក៏អាយុច្រើនហើយ។ មិនត្រឹមតែប៉ុណ្ណោះ លោក ឈិន កុសល លើកឡើងពី នាយព្រែក ថា៖ «ដំបូង មើលឃើញ នាយព្រែក ជាអ្នកកំប្លែង ដូចគាត់មិនសូវច្បាស់ គាត់អ្នកលេងសើចច្រើន ហើយលោកក៏មិនសូវទុកចិត្តដែរ ដូច្នេះលោកមានកូនស្រី លោកត្រូវប្រុងប្រយ័ត្ន លោកមិនទុកចិត្ត ទើបឱ្យកូនៗមើលចិត្តគ្នាសិនទៅ ប៉ុន្តែក៏មិនផ្តាច់ទំនាក់ទំនងដែរ»។
លោក ឈិន កុសល ក៏បានបញ្ជាក់ពីមូលហេតុ ឱ្យកូនស្រី និង នាយព្រែក មើលចិត្តគ្នាឱ្យបានច្រើនឆ្នាំសិន ក៏ព្រោះតែលោកមិនចង់ឱ្យមានពាក្យពីមហាជន ថាអ្នកសិល្បៈស្រឡាញ់គ្នាតែមួយភ្លែតបែកបាក់គ្នា ប៉ុន្តែពេលនេះ កូនស្រី និង នាយព្រែក មើលចិត្តគ្នាបានយូរឆ្នាំហើយ៕
សូមចុចទីនេះ ដើម្បីទស្សនាវីដេអូទី៖
