បើរំឭកកាលពីបុន្មានឆ្នាំមុន មហាជនច្បាស់ជាបានស្គាល់មកហើយ កញ្ញា លៀង ចាន់ឡា ដែលចាប់ផ្តើមមានឈ្មោះបោះសំឡេង ក្រោយពីបានចូលរួមប្រលងនៅក្នុងកម្មវិធីប្រលងចម្រៀង X Factor Cambodia របស់ទូរទស្សន៍ហង្សមាស។
កាលណោះ លៀង ចាន់ឡា ទទួលបានការអាណិតអាសូរជាខ្លាំងពីសំណាក់មហាជន ពាក់ព័ន្ធលើរូបសម្រស់ ព្រមទាំងជីវភាពរស់នៅរបស់នាង រហូតមានម្ចាស់ហាងកែសម្ជស្សមួយចំនួន បានចេញមុខជួយកែសម្ជស្សឱ្យ ដោយមិនគិតប្រាក់រួមនឹងផ្ដល់ជាជំនួយនានាជាច្រើនផងដែរ។ ម្យ៉ាងវិញទៀត ចាប់ពីពេលនោះមក នាងក៏បានចាប់អាជីពជាតារាចម្រៀង និង ច្រៀង ដើម្បីរកកម្រៃទៀតផង។
យ៉ាងណាមិញ កាលពីអំឡុងដើមឆ្នាំ ២០២១ ស្របពេលការរាតត្បាតជំងឺកូវីដ- ១៩ កញ្ញា លៀង ចាន់ឡា បានធ្វើឱ្យមហាជនមានការភ្ញាក់ផ្អើលយ៉ាងាខ្លាំង បន្ទាប់ពីទទួលបាននាងធ្លាក់ខ្លួនរហូតអត់បាយ អត់ទឹក គ្មានលុយសូម្បីតែបង់បន្ទប់ជួល ហើយម៉ូតូត្រូវលក់អស់ទៀត ដោយសារត្រូវយកលុយទៅព្យាបាលជំងឺធ្ងន់របស់ម្តាយទៀត។ ជាងនេះទៅទៀត ចំណូលរកបានពីការច្រៀងក៏គ្មាន ក៏ព្រោះកន្លែងធ្វើការត្រូវបានបិទផងនោះ។
ក្រោយព្យុះជីវិតបោកបក់មួយរយៈពេលធំនោះ លៀង ចាន់ឡា បានធ្វើការក្នុងរោងចក្រក្នុងនាមជាកម្មការិនី ដើម្បីរកកម្រៃដើម្បីចិញ្ចឹមជីវិត និង ហាក់ស្ងប់ស្ងាត់លើវិថីសិល្បៈ ក៏ដូចជាបណ្តាញសង្គមនានាទៀតផង។
ដោយឡែក កាលពីអំឡុងឆ្នាំ ២០២៣ តារាស្រីរូបនេះ ក៏បានចេញមុខលើវិថីសិល្បៈជាថ្មី ដោយនាងបានចេញចម្រៀងថ្មី និង បង្ហាញមុខម្តងម្កាលក្នុងកម្មវិធីកម្សាន្តមួយចំនួនផងដែរ។ មិនត្រឹមតែប៉ុណ្ណោះ ក្រោយចាប់ផ្តើមអាជីពជាតារាចម្រៀងវិញនោះ នៅថ្ងៃទី ២១ ខែមេសា ឆ្នាំ ២០២៥ នេះ កញ្ញា លាង ចាន់ឡា បានបញ្ចេញចម្រៀងថ្មីរបស់ខ្លួនជាថ្មីម្តងទៀត ដោយមានចំណងជើងថា «បែកស្នេហ៍នាចំណតរថភ្លើង»។ ក្នុងនោះដែរ អ្វីដែលមហាជនក៏បានសរសើរដល់ លាង ចាន់ឡា ផងដែរ ដោយសំឡេងរបស់នាងពីរោះដូចដើម៕
សូមចុចទីនេះ ដើម្បីទស្សនាវីដេអូ៖
