ជាការពិតណាស់ បច្ចុប្បន្នការទស្សនាមាតិកាផ្សេងៗពីការផលិតរបស់ Content Creator និង Influencer ជាច្រើននៅលើបណ្តាញសង្គម ហាក់កំពុងទទួលបានការចាប់អារម្មណ៍។ ក្នុងនោះដែរ គេក៏ឃើញមាន Influencer ជាសាសន៍ដទៃមួយចំនួន ក៏បានក្លាយជាទីចាប់អារម្មណ៍របស់អ្នកគាំទ្រកម្ពុជាដូចគ្នាដែរ។
ជាក់ស្តែង មហាជនអ្នកនិយមលេងបណ្តាញសង្គមហ្វេសប៊ុក កំពុងតែផ្ទុះការចាប់អារម្មណ៍យ៉ាងខ្លាំងទៅកាន់ Influencer ជនជាតិកូរ៉េ Inzi ដែលបានបង្ហាញវីដេអូជាច្រើនទាក់ចិត្តអ្នកទស្សនា ជាមួយភាពកំប្លុកកំប្លែង និង និយាយភាសាខ្មែរបានយ៉ាងល្អ។
ក្នុងនោះ អ្នកលេងបណ្តាញសង្គមនានាកាន់តែចាប់អារម្មណ៍ និង សរសើរទេពកោសល្យរបស់ Influencer ជនជាតិកូរ៉េ Inzy យ៉ាងខ្លាំង ដែលរាល់វីដេអូនាងបានបង្ហោះនៅលើផេកហ្វេសប៊ុកផ្លូវការរបស់ខ្លួនឈ្មោះថា «Inzi Darling កូរ៉េដើរលេង» និង ផេកនានានោះ គឺទទួលបានការចូលទស្សនាយ៉ាងច្រើន។
អ្វីដែលបានធ្វើឱ្យអ្នកទស្សនា កញ្ញា Inzi ចូលចិត្តមើលវីដេអូរបស់នាងនោះ ក៏ព្រោះ Influencer ជនជាតិកូរ៉េស្រស់ស្អាតរូបនេះ អាចនិយាយភាសាខ្មែរបានយ៉ាងល្អទៀតផង។ បច្ចុប្បន្ន Inzi ក៏ បានក្លាយទៅជាទូតសុឆន្ទៈរបស់បណ្តាក្រុមហ៊ុនក្នុងប្រទេសកម្ពុជាមួយចំនួនដែរ។
កាលពីអំឡុងដើមឆ្នាំ ២០២៥ អ្នកគាំទ្រក៏មានការនឹករឭកដល់ Influencer ជនជាតិកូរ៉េ Inzi យ៉ាងខ្លាំងដែរ ក៏ព្រោះនាងបានវិលត្រឡប់ទៅកាន់ប្រទេសកូរ៉េវិញមួយរយៈ និង មិនសូវបានផលិតវីដេអូជូនអ្នកគាំទ្រទស្សនា។ យ៉ាងណាមិញ នៅដើមខែឧសភា នេះ ស្រីស្អាត Inzi បានវិលត្រឡប់មកកាន់បណ្តាញសង្គមវិញហើយ និង បានប្រកាសដំណឹងល្អថានាងកំពុងពពោះ ៤ ខែទៀតផង។
អ្វីដែលកាន់តែធ្វើឱ្យអ្នកគាំទ្ររំភើបចិត្តជាមួយនឹង Influencer ជនជាតិកូរ៉េ Inzi នោះ ខណៈនាងបានប្រកាសថា កូនក្នុងផ្ទៃរបស់នាងជាកូនភ្លោះ ហើយជាកូនស្រីទៀតផង។ លើសពីនោះ Inzi ក៏សំណូមពរឱ្យអ្នកគាំទ្រជួយដាក់ឈ្មោះឱ្យកូនស្រីផង ជាភាសាខ្មែរក៏បាន ជាភាសាអង់គ្លេសក៏បាន៕
