និយាយពី អ្នកនាង មៀលីយ៉ាន នីតា សាំង ជាបេក្ខនារី Top 5 Miss Universe Cambodia 2024 ដែលប្រកួតក្នុងឆ្នាំ ២០២៤ នេះ ដ្បិតតែអ្នកនាងមិនបានក្លាយជាម្ចាស់ជ័យលាភីគ្រងមកុដប្រចាំឆ្នាំ ២០២៤ នេះមែន តែអ្នកនាងក៏ជាបេក្ខនារី Top 5 ដ៏លេចធ្លោពេញដោយសមត្ថភាព ចំណេះដឹង និង បទពិសោធច្រើនមួយរូប។
យ៉ាងណាមិញ ក្រោយពីមានឈ្មោះជា Top 5 Miss Universe Cambodia 2024 មួយរយៈក្រោយនេះ អ្នកនាង មៀលីយ៉ាន បានបង្ហាញសកម្មភាពយ៉ាងសកម្មក្នុងវិស័យបវរកញ្ញាដោយបានចូលរួមកម្មវិធីផ្សេងៗ ព្រមទាំងកិច្ចការងារសង្គមជាច្រើនផងដែរ។
លើសពីនេះ ក្រៅពីមានសមត្ថភាពខ្លាំងលើវិស័យបវរកញ្ញា និង ទេពកោសល្យនៃការសម្ដែង អ្នកនាង មៀលីយ៉ាន ក៏បានធ្វើឱ្យមហាជនអ្នកគាំទ្រកាន់តែចាប់អារម្មណ៍សរសើរខ្លាំងចំពោះបវរកញ្ញារូបនេះ ខណៈបានបង្ហាញវត្តមានជាលើកដំបូងក្នុងនាមជាពិធីការិនីលើឆាកអន្តរជាតិដ៏ធំ MPI 2024 កន្លងទៅ ដ្បិតតែជាលើកដំបូង ប៉ុន្តែអ្នកនាងហាក់មានសមត្ថភាពខ្ពស់ក្នុងអាជីពនេះ ធ្វើបានល្អខ្លាំង ទាំងការប្រើវោហាស័ព្ទ និង ភាសាអង់គ្លេសរបស់នាងស្ទាត់ជំនាញណាស់។
ដោយឡែក ថ្មីៗកន្លងទៅនេះ អ្វីកាន់តែធ្វើឱ្យអ្នកគាំទ្ររំភើបអបអរជំនួស ក្រោយពីទទួលដំណឹងថាអ្នកម៉ាក់រូបស្រស់នេះ ទទួលបានតំណែងថ្មីជា Super Talent of the Cambodia 2025 ដែលនឹងត្រៀមតំណាងឱ្យប្រទេសកម្ពុជាចូលរួមប្រកួតនៅលើឆាកអន្តរជាតិ Miss Super Talent of the World 2025 នៅទីក្រុងសេអ៊ូល ប្រទេសកូរ៉េខាងត្បូង ចាប់ពីថ្ងៃទី ១៩ ដល់ថ្ងៃទី ២៨ ខែ កុម្ភៈ ឆ្នាំ ២០២៥ ខាងមុខ។ ពេលនេះដែរ អ្នកនាង មៀលីយ៉ាន ក៏កំពុងធ្វើការហ្វឹកហាត់ត្រៀមខ្លួនយ៉ាងមោះមុតក្នុងដំណើរឆ្ពោះទៅប្រកួតលើឆាកអន្តរជាតិក្នុងកម្មវិធីដ៏ធំនេះផងដែរ៕
សូមចុចទីនេះដើម្បីទស្សនាវីដេអូ៖
