ក្រៅពីចូលរួមចំណែកយ៉ាងសកម្មលើសកម្មភាពសប្បុរសធម៌ ដើម្បីជួយជនរងគ្រោះក្នុងពេលកម្ពុជារងការឈ្លានពាន ឃើញថាអ្នកសិល្បៈជាច្រើន ក៏បានចូលរួមប្រើសំឡេងដើម្បីជួយផ្សព្វផ្សាយប្រឆាំងតតាំងនឹងការឈ្លានពាន និង ការបំភ្លៃនូវការពិតលាបពណ៌របស់ថៃមកលើកម្ពុជា ដែលអ្នកសិល្បៈចេញនិយាយជាវីដេអូ និង ចេញជាចម្រៀងបន្តបន្ទាប់ រៀបរាប់ពីក្ដីឈឺចាប់នៃមហាជនកម្ពុជា។
ជាក់ស្ដែង ក្រឡេកមើលតារាចម្រៀងស្រី ទេព បូព្រឹក្ស និង ស្វាមី បន្ទាប់ពីចំណាយទាំងកម្លាំងស្មារតី និង ថវិកា ធ្វើសប្បុរសធម៌ចុះជួយកងទ័ពជួរមុខ និង ជនភៀសសឹក ព្រមទាំងប្រើសំឡេងក្នុងផ្សព្វផ្សាយពីកម្ពុជា ថ្មីៗនេះ ថែមទាំងបានឃើញអ្នកនាង បានចេញចម្រៀងមួយបទ គឺ «យុទ្ធសង្គ្រាម» ពេញដោយអត្ថន័យ និង អំណាចនៃទឹកដីកម្ពុជា ដែលរៀបរាប់ពីទង្វើឈ្លានពានដ៏តិរច្ឆានរបស់ថៃមកលើកម្ពុជា។
ក្នុងនោះ អ្នកនាង ទេព បូព្រឹក្ស បានបង្ហោះរៀបរាប់បន្ថែមពីលើអត្ថន័យចម្រៀងថា ៖ «តំណក់ឈាមដែលបានបន្តក់នៅលើដែនដី នេះគឺជាអំណោយពីមហាទេវរាជ ជាតំណក់ឈាមនៃស្តេចចក្រពត្តិ ដែលពូជសាសន៍ចោរសន្សំចិត្តលេបត្របាក់យកទឹកដីអច្ឆរិយៈមួយនេះ រាប់តំណនៃត្រកូល។ សិលាចារឹកបណ្តាសាដែលជាប់សិលា ប្រាង្គប្រាសាទនឹងអន្ទោលតាមពូជចោរនឹងរងបណ្តាសាម៉ឺនជាតិ ដួងវិញ្ញាណនៃការពលីដណ្តើម និង កម្ទេចនូវរចនាបទប្រាសាទនឹងរងកម្មធ្លាក់នរកអនន្តរិយកម្ម រហូតដល់ព្រះអាទិត្យ និងព្រះច័ន្ទលែងមានពន្លឺ។ ខ្មែរនឹងតតាំងរហូតដល់តំណក់ឈាមចុងក្រោយ ដើម្បីការពារបូរណភាពដែនដី អធិបតីភាពនគរកម្ពុជា។ ព្រលឹងបុព្វបុរសស្តេចមេទ័ព ស្តេចអថ័ន នឹងឃុំគ្រងថែរក្សាដល់វីរៈជនយើងគ្រប់រូបដោយអានុភាពអាថ៌កំបាំងពីមហាទេវរាជ ជារបស់យើងហាមបំពាន»៕
សូមចុចទីនេះដើម្បីទស្សនាវីដេអូ៖
