នៅថ្ងៃទី ១៥ មិថុនា ឆ្នាំ ២០២៥ កន្លងទៅ រាជរដ្ឋាភិបាលកម្ពុជាបានបញ្ជូនលិខិតជាផ្លូវការទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយពាក់ព័ន្ធទៅនឹងបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និង តំបន់មុំបី។
ប្រជាជនកម្ពុជាក៏បានបង្ហាញពីការគាំទ្រដល់ការសម្រេចចិត្តរបស់រាជរដ្ឋាភិបាល និង បានលើកទឹកចិត្តដល់វីរកងទ័ពជួរមុខនៅតាមបន្ទាត់ព្រំដែន តាមរយៈរូបភាពផ្សេងៗគ្នាជាច្រើន ដោយរួមមានការបង្កើតមូលនិធិប្រមូលថវិកា ការបរិច្ចាគដោយផ្ទាល់ពីមហាជន និង សកម្មភាពជាច្រើនទៀត។
ក្នុងនោះដែរ បើក្រឡេកមកកាន់សិល្បករ សិល្បការិនីវិញ ក៏បានចូលរួមចំណែកដូចគ្នាក្នុងការលើកទឹកចិត្តដល់កងកម្លាំងកំពុងឈរជើងនៅបន្ទាត់ការពារព្រំដែន។
ជាក់ស្តែង សមាជិកក្រុមចម្រៀងរ៉េប La Cima Cartel គឺលោក All3rgy និង លោក Hasha ក៏បានបង្ហាញឆន្ទៈនៃការលើកទឹកចិត្តតាមរយៈបទចម្រៀងថ្មីរបស់អ្នកទាំង ២ ដោយមានចំណងជើងថា «មិត្តរួមអាវុធ»។ MV ចម្រៀងមួយនេះ បានចេញផ្សាយជាផ្លូវការហើយ ដោយបានបង្ហាញនូវរូបភាពឯកសារជាច្រើន នៃការប្រឹងប្រែងរបស់យោធិន។
លើសពីនោះ អត្ថន័យនៃបទចម្រៀងវិញ បានធ្វើឱ្យប្រជាជនខ្មែរស្តាប់ហើយដក់ជាប់ក្នុងក្រអៅបេះដូង និង បានបង្ហាញការយល់ដឹងកាន់តែច្បាស់ពីសុខទុក្ខរបស់កងកម្លាំង ដែលកំពុងបំពេញភារកិច្ចការពារជាតិ៕
សូមចុចទីនេះ ដើម្បីទស្សនាវីដេអូ៖
