មហាជនបានជ្រាបមកហើយ ពីទេពកោសល្យរបស់ អ្នកនាង ខាត់ សុឃីម លើវិថីសិល្បៈ ដែលគេបានដាក់ងារអ្នកនាងថា ជាតារាស្រីពហុជំនាញ។ ក្នុងនោះ ទាំងចម្រៀងបុរាណ សម័យ ទាំងការសម្តែង ទាំងជាពិធីករ និង របាំ ក៏អ្នកនាង ខាត់ សុឃីម អាចធ្វើបាន។
ក្នុងនោះដែរ រយៈពេលប្រមាណជា ៣០ ឆ្នាំ ឈរនៅលើវិថីសិល្បៈរបស់អ្នកនាង ខាត់ សុឃីម បើនិយាយពីប្រជាប្រិយភាព គឺមិនសាបសូន្យទៅណានោះឡើយ ដោយរាល់សកម្មភាពសិល្បៈរបស់រៀមច្បងរូបនេះ នៅតែទទួលបានការគាំទ្រ និង មានទីផ្សារការងារសិល្បៈមិនធម្មតា។
ងាកមកកាន់ការផលិតចម្រៀងឯណោះវិញ បើគិតមកដល់ពេលនេះ បទចម្រៀងរាប់រយបទមកហើយ ដែលអ្នកនាង ខាត់ សុឃីម បានច្រៀង និង ទទួលបានប្រជាប្រិយភាព មិនថាបទ សម័យ បុរាណ និង សហសម័យនោះឡើយ។
យ៉ាងណាមិញ ថ្មីៗនេះ មានមហាជនមួយចំនួនទើបតែបានស្គាល់អ្នកនិពន្ធជើងចាស់លាក់មុខមួយរូប ជាអ្នកខេត្តកំពង់ធំ ដែលបាននិពន្ធចម្រៀងឱ្យអ្នកនាង ខាត់ សុឃីម ក្នុងឱកាសចូលឆ្នាំខ្មែរផ្ទុះខ្លាំង ប៉ុន្មានឆ្នាំជាប់គ្នា ក្នុងនោះរួមមានបទ «អូនលែងប្តីហើយ» និង បទ «នៅផ្ទះប្តីអូន នៅក្រៅប្តីអូន» គឺលោក គិន កក្កដា ហៅ ស្ទឹងសែនកវី។
លោក គិន កក្កដា គឺជាអ្នកនិពន្ធជើងចាស់មួយរូប ដែលលោកបានសាងស្នាដៃជាច្រើនឆ្នាំមកហើយ ដោយក្នុងនោះបទចម្រៀងល្បីៗ ដែលោកបាននិពន្ធឱ្យអ្នកនាង ខាត់ សុឃីម កាលពីនៅផលិតកម្ម SBB មានដូចជាបទ «ម៉ែខ្ញុំក្រមុំចាញ់» និង បទ «ស្អប់ប្រុសមាត់ក្អែក» ជាដើម។ រីឯបទថ្មីៗ ល្បីៗរួមមានបទ «អូនលែងប្តីហើយ» និង «នៅផ្ទះប្តីអូន នៅក្រៅប្តីអូន»។ លើសពីនោះ លោក គិន កក្កដា ក៏បាននិពន្ធចម្រៀងឱ្យតារាប្រុសស្រីល្បីៗជាច្រើនទៀតដែរ៕
សូមចុចទីនេះ ដើម្បីទស្សនាវីដេអូ៖
