ពិតណាស់ ថ្មីៗនេះ កញ្ញា ប៊ី សុធារី បានធ្វើឱ្យមហាជនអ្នកគាំទ្រវិស័យបវរកញ្ញាជាច្រើនបង្ហាញក្ដីរំភើបជាថ្មី និង គាំទ្រយ៉ាងពេញទំហឹង ក្រោយឃើញនាងបង្ហាញវត្តមានចូលជាបេក្ខភាពប្រកួតវិស័យបវរកញ្ញាម្ដងទៀតក្នុងកម្មវិធី Miss Cosmo Cambodia 2025។
ជាមួយគ្នានោះ ស្របពេល កញ្ញា ប៊ី សុធារី បន្តក្ដីស្រមៃលើវិស័យបវរកញ្ញាក្នុងកម្មវិធី MCC 2025 នេះដែរ លើបណ្ដាញសង្គមក៏មានរឿងរ៉ាវខ្លះធ្វើឱ្យមហាជនអ្នកគាំទ្រវិស័យបវរកញ្ញាផ្ទុះការវែកញែកខ្លាំងផងដែរ។
យ៉ាងណាមិញ ក្រោយក្លាយជាបេក្ខភាពផ្លូវការរបស់ MCC 2025 នេះ ក្នុងថ្ងៃបំពាក់ឆៀងថ្ងៃទី ១៣ ខែមីនា ឆ្នាំ ២០២៤ កញ្ញា ប៊ី សុធារី ក៏បានផ្ដល់កិច្ចសម្ភាសជាមួយ «ប្រជាប្រិយ» ដែលបានទម្លាយ និង រៀបរាប់ពីមូលហេតុផ្សេងៗចំពោះវិលត្រឡប់ចូលប្រកួតជាថ្មីនេះផងដែរ។
ក្នុងវីដេអូសម្ភាសនេះ អ្វីដែលកាន់តែចាប់អារម្មណ៍ខ្លាំង ខណៈកញ្ញា ប៊ី សុធារី បានឆ្លើយតបមួយឆ្ញាញ់ ចំពោះពាក្យដែលនាងតែងតែឮគេនិយាយថាបេក្ខភាពចូលប្រកួតបវរកញ្ញាមុខដដែលៗ ដោយនាងបានលើកនិយាយថាចំពោះការចូលប្រកួត ប្រសិនអ្នកថ្មីខ្លាំង អាចប្រកួតប្រជែងឈ្នះនាង គេនឹងអាចយកមកុដទៅប្រកួតលើឆាកអ្នកអន្តរជាតិ ប៉ុន្តែបើនាងខ្លាំងជាង នាងនៅតែអាចទៅប្រកួតនៅឆាកអន្តរជាតិដដែលអ៊ីចឹង ដោយនាងគិតថាការប្រកួតលើឆាកអន្តរជាតិគេមិនខ្វល់ថាបវរកញ្ញាម្នាក់ហ្នឹង មុខថ្មីឬមុខចាស់ឡើយ គឺសំខាន់គេមើលលើសមត្ថភាពម្នាក់ហ្នឹងខ្លាំងឬអត់។
ក្នុងនោះដែរ កញ្ញា ក៏បានបន្តថានាងមិនដែលហាមអ្នកថ្មីៗចូលប្រកួតឡើយ មានតែសប្បាយចិត្តពេលឃើញអ្នកជំនាន់ថ្មីចូលរួមប្រកួតដូចគ្នា។ យ៉ាងណា ចំពោះរូបនាងផ្ទាល់ ពេលនេះមានវ័យ ២៧ ឆ្នាំ នាងគិតថានៅអាចប្រកួតបាន សមត្ថភាពនៅមានពេញលេញ រីឯរូបសម្បត្តិក៏នៅអាចប្រកួតបាន ដូចនេះនាងមិនចង់ចំណាយពេលវេលា និង ទុកសមត្ថភាពចោលនោះទេ៕
សូមចុចទីនេះដើម្បីទស្សនាវីដេអូ៖
