កាលពីថ្ងៃទី ០៨ ខែឧសភា ឆ្នាំ ២០២៥ កន្លងទៅនេះ មហាជនអ្នកលេងបណ្តាញសង្គមហ្វេសប៊ុក ជាពិសេសអ្នកគាំទ្រតារាចម្រៀង មាស សុខសោភា មានការភ្ញាក់ផ្អើលយ៉ាងខ្លាំង ក្រោយពីបានដឹងដំណឹងនៃការបែកបាក់គ្នារវាងនាង និង ស្វាមី គឺលោក អ៊ិត រ៉ាដា តាមរយៈការឡាយវីដេអូប្រមាណជា ១ ម៉ោងកន្លះ នៅលើផេកហ្វេសប៊ុកផ្លូវការរបស់នាង។
ក្រោយទទួលដំណឹងខាងលើនេះ មហាជនជាច្រើនបានបញ្ចេញមតិរៀងៗខ្លួន ដោយភាគច្រើនបានសម្ដែងការសោកស្ដាយ និង លើកទឹកចិត្តដល់អ្នកនាងចំពោះរឿងរ៉ាវដែលបានកើតឡើង។ ដោយឡែក ក្នុងនោះក៏មានមហាជនមួយចំនួនបានប្រតិកម្មរិះគន់ ក៏ដូចជាស្ដីបន្ទោសដល់អ្នកនាង មាស សុខសោភា ដែរ ដោយលើកឡើងពាក់ព័ន្ធនឹងរឿងរ៉ាវជំនឿរបស់នាង។
ក្រោយទទួលបានការបារម្ភ អមគ្នានឹងការវែកញែកផងនោះ នៅយប់ថ្ងៃទី ០៩ ខែឧសភា ឆ្នាំ ២០២៥ កន្លងទៅ អ្នកនាង មាស សុខសោភា ក៏បានចេញមុខមកបកស្រាយសាជាថ្មី និង បានអរគុណទៅដល់អ្នកគាំទ្រ ព្រមទាំងមិត្តភក្តិរួមអាជីព ដែលបានព្រួយបារម្ភពីនាង។ ក្នុងនោះ អ្នកនាង ក៏បានបញ្ជាក់ថា បញ្ហាផ្លូវចិត្តរបស់នាងបានជាសះស្បើយហើយ។
យ៉ាងណាមិញ អ្វីដែលជាប្រធានបទរសើបជាថ្មី ក្នុងការចេញមកបកស្រាយម្តងទៀតនោះដែរ អ្នកនាង មាស សុខសោភា បានឱ្យដឹងថា ការបែកបាក់ស្វាមី និង រឿងលោកតាឥសី រឿងជំនឿ គឺជារឿងដាច់ដោយឡែកពីគ្នា គ្មានអ្វីពាក់ព័ន្ធគ្នានោះឡើយ។
លើសពីនោះ អ្នកនាង បានបន្តទទូចសុំដល់អតីតស្វាមី គឺលោក អ៊ិត រ៉ាដា ឈប់បន្តពាក់ព័ន្ធរូបនាង ខណៈកន្លងមកអ្នកទាំង ២ បានសម្រេចលែងលះគ្នា ដោយសន្តិវិធី និង តាមផ្លូវច្បាប់ទៅហើយនោះ៕
សូមចុចទីនេះ ដើម្បីទស្សនាវីដេអូ៖
