ពិតណាស់ បន្ទាប់ពីផលិតកម្ម Tiny Film Production បានប្រកាសផលិតភាពយន្តខ្នាតធំដ៏ព្រឺព្រួចរឿង «ខ្មោចដើមចេកជ្វា» ក្នុងឆ្នាំ ២០២៥ ឡើងវិញ ធ្វើឱ្យមហាជនអ្នកគាំទ្រវិស័យភាពយន្តខ្នាតធំ បានផ្ទុះចាប់អារម្មណ៍តាមដាន និង បង្ហាញចិត្តរងចាំទស្សនាស្នាដៃថ្មីនៃការផលិតសាច់រឿងថ្មីនេះដែរ។
ស្របគ្នានោះ ផលិតកម្មក៏បានបង្ហោះបង្ហើបទាក់ទងនឹងការត្រៀមថតសាច់រឿង «ខ្មោចដើមចេកជ្វា» ២០២៥ នេះជាបន្តបន្ទាប់ ដោយបានជ្រើសរើសតួអង្គសម្ដែងរួចរាល់ហើយ រីឯទីតាំង និង ប្លង់ផ្សេងៗក៏កំពុងស្វែងរកត្រៀមដំណើរការថតឆាប់ផងដែរ។
លើសពីនេះ ថ្មីៗកន្លងទៅ ក៏បានឃើញខាងផលិតកម្ម Tiny Film Production បានបង្ហោះរូបភាពផ្ទះបុរាណមួយដូចទៅនឹងផ្ទះបុរាណចាស់ថតរឿងនេះកាលពីជំនាន់ឆ្នាំ ២០០៥ ដោយអាចនឹងជាទីតាំងដែលផលិតកម្មជ្រើសរើសត្រៀមថតឡើងវិញក្នុងឆ្នាំ ២០២៥ នេះផងដែរ។
ដោយឡែក ដ្បិតតែផលិតកម្មមិនទាន់បើកបង្ហាញមុខតួអង្គនីមួយៗច្បាស់មែន ប៉ុន្តែមកដល់ពេលនេះ ផលិតកម្មក៏បានបើកដំណើរការថតភាពយន្តនេះជាផ្លូវការហើយ ក្រោយពីបានឃើញវីដេអូនៃទិដ្ឋភាពរបស់ក្រុមការងារថតប្លង់មួយនៅក្នុងផ្ទះបុរាណ ជាមួយនឹងតួអង្គដែលសម្តែងជានាង នុត ថតពីចម្ងាយត្រង់ឈុតកំពុងស្រែកហៅប្ដីត្រឡប់មកផ្ទះវិញ ពេលដែលនាយ សូរ ជាប្តីបានដឹងថានាងបានស្លាប់ក្លាយជាខ្មោច មើលទៅកាន់តែព្រឺសម្បុរ៕
