កាលពីដើមខែកុម្ភៈ ឆ្នាំ ២០២៥ កន្លងទៅ មហាជនអ្នកលេងបណ្តាញសង្គមហ្វេសប៊ុក ជាពិសេស អ្នកស្នេហាវិស័យរបាំបុរាណច្បាស់ជាបានជ្រាបមកហើយនូវដំណឹងសុខភាពរបស់នាដការបាំ កញ្ញា សាលី ស្រីមាស ដែលមានជំងឺខូចក្រលៀន ដោយត្រូវការចំណាយថវិកាជាច្រើនសម្រាប់ព្យាបាលបញ្ជូលឈាម និង លាងឈាមរៀងរាល់អាទិត្យ។
ក្នុងនោះដែរ អ្នកសិល្បៈ និង មិត្តភក្តិជាច្រើនបានបន្តចែករំលែកព័ត៌មាន និង ទទូចស្នើសុំសប្បុរសជនមេត្តាចូលរួមបរិចា្ចគថវិកា ដើម្បីសម្រួលដល់ការព្យាបាលនាដការបាំ សាលី ស្រីមាស ខណៈក្រុមគ្រួសារអស់លទ្ធភាពក្នុងការព្យាបាល និង ជួយដល់ជីវិតធនធានមនុស្សក្នុងវិស័យរបាំបុរាណដូចជានាងផង។
ក្រោយការអំពាវនាវខាងលើក៏មានមហាជន មានទឹកចិត្តសប្បុរសធម៌បានចូលរួមបរិច្ចាគថវិកាទៅតាមទឹកចិត្តរៀងៗខ្លួនជូនដល់ សាលី ស្រីមាស ជាបន្តបន្ទាប់ផងដែរ។ លើសពីនោះ អ្វីដែលកាន់តែរំភើបចិត្តអ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយកក្រុមហ៊ុន ជីប ម៉ុង និង លោកជំទាវ បានប្រកាសទទួលរ៉ាប់រងថ្លៃព្យាបាលទាំងស្រុងដល់ សាលី ស្រីមាស។
ក្រោយពីទទួលបាន ការរ៉ាប់រងថ្លៃព្យាបាលទាំងស្រុង អ្នកឧកញ៉ា លាង ម៉េង និង លោកជំទាវ ហើយនោះ នាដការបាំ សាលី ស្រីមាស ក៏បានចាកចេញពីប្រទេសកម្ពុជាកាលពីអំឡុងដើមខែមីនា ឆ្នាំ ២០២៥ កន្លងទៅ ដើម្បីព្យាបាលនៅឯប្រទេសឥណ្ឌា។
យ៉ាងណាមិញ ក្រោយពីបានចាកចេញទៅព្យាបាលអស់រយៈពេលប្រមាណជាង ២ ខែ ហើយនោះ កាលពីថ្ងៃទី ១០ ខែឧសភា ឆ្នាំ ២០២៥ កន្លងទៅ កញ្ញា សាលី ស្រីមាស បានបង្ហោះវីដេអូមួយ ធ្វើឱ្យមហាជន និង មិត្តភក្តិមានក្តីរំភើបយ៉ាងខ្លាំង ដោយនាងបានឱ្យដឹងថា ការវះកាត់ប្តូរក្រលៀនរបស់នាងបានជោគជ័យហើយ។ ក្នុងនោះ ក្រោយការជម្រាបពីស្ថានភាពជំងឺរបស់ សាលី ស្រីមាស ហើយ មហាជន និង មិត្តភក្តិ ទាំងក្នុងក្រៅសិល្បៈបានបង្ហាញការអបអរ និង សង្ឃឹមថា សាលី ស្រីមាស នឹងបង្ហាញវត្តមានឆាប់ៗនេះ នៅលើអាជីពចាស់ជានាដការបាំរបស់នាងផងដែរ៕
សូមចុចទីនេះ ដើម្បីទស្សនាវីដេអូ៖
