នៅរសៀលថ្ងៃទី ២៨ ខែមីនា ឆ្នាំ ២០២៥ នេះ ទីក្រុងបាងកក ប្រទេសថៃ បានរងការវាយប្រហារដោយគ្រោះរញ្ជួយដីកម្រិត ៧.៤ រ៉ិចទ័រ បង្កឱ្យអគារជាច្រើនរញ្ជួយដីយោលយោគ ខ្លះក៏បាក់រលំ មនុស្សរត់ប្រសាចគួរឱ្យរន្ធត់បំផុត។
តាមភ្នាក់ងារជំនាញខាងភូមិសាស្ត្រ GFZ របស់អាល្លឺម៉ង់បានឱ្យដឹងថា គ្រោះរញ្ជួយដីទាំងកណ្ដាលថ្ងៃត្រង់នេះដែរមានជម្រៅ ១០ គីឡូម៉ែត្រ ជាមួយចំណុចកណ្ដាលស្ថិតនៅប្រទេសមីយ៉ាន់ម៉ា នេះបើតាមរបាយការណ៍បឋម។ ចំពោះទំហំនៃការខូចខាត និង អ្នករងរបួស ឬ ស្លាប់នៅក្នុងប្រទេសមីយ៉ាន់ម៉ា មិនទាន់មានការបញ្ជាក់នៅឡើយទេ។
ដោយឡែក សម្រាប់ប្រទេសថៃ ពិសេសនៅចំណុចទីក្រុងបាងកក ក៏ទទួលឥទ្ធិពល និង រងគ្រោះរញ្ជួយដីនេះដែរ ក្នុងកម្រិត ៧.៤ រិចទ័រ។ តាមសេចក្តីរាយការណ៍ នៅទីក្រុងបាងកកគឺមានមនុស្សរស់នៅជាង ១៧ លាននាក់ ដោយភាគច្រើនរស់នៅអាផាតមិនខ្ពស់ៗ។ អ្វីដែលគួរឱ្យស្លុត គ្រោះរញ្ជួយដីនេះមានកម្លាំងខ្លាំង រហូតអាចឱ្យទឹកបែកខ្ជាយចេញពីអាងនៃអគារខ្ពស់ៗនៅកណ្ដាលក្រុងបាងកកនេះ ធ្វើឱ្យមនុស្សក្នុងអគារខ្ពស់ៗជាច្រើន ត្រូវបានជំរុញជម្លៀសចេញពីអគារភ្លាមៗ ខណៈអគារទាំងនោះត្រូវបានរញ្ជួយខ្លាំងក្នុងគ្រោះធម្មជាតិដ៏ខ្លាំងក្លា និង កម្រមួយនេះ។
ជាក់ស្ដែង តាមរយៈវីដេអូខ្លីមួយ បានបង្ហោះនៅថ្ងៃទី ២៨ ខែមីនានេះ បង្ហាញពីអគារដែលកំពុងសាងសង់មួយកន្លែងនៅក្រុងបាងកក ប្រទេសថៃ ត្រូវបានរញ្ជួយដីធ្វើឱ្យរលំស្ដែងៗ ចំណែកកម្មករក៏រត់រកប្រាសអាយូសរៀងខ្លួន៕
សូមចុចទីនេះ ដើម្បីទស្សនាវីដេអូ១ ៖
សូមចុចទីនេះ ដើម្បីទស្សនាវីដេអូ២ ៖
