មហាជនបានតាមដានការវិលត្រឡប់មកឆាកប្រកួតជាថ្មី របស់បវរកញ្ញា ហុក សារិតុលា ក្នុងកម្មវិធី Miss Supranational Cambodia 2025 នោះ គឺទទួលបានស្រឡាញ់គាំទ្រច្រើនពីមហាជន ដោយជឿជាក់លើសមត្ថភាពដ៏លេចធ្លោរបស់នាង និង រំពឹងខ្ពស់ថានឹងអាចឈ្នះមកុដក្នុងឆ្នាំ ២០២៥។ តែយ៉ាងណាក៏ដោយ សោកស្តាយ ហុក សារិតុលា ដណ្តើមបានតតំណែងត្រឹមលំដាប់រងទី ២ ខណៈម្ចាស់មកុដបានទៅលើ បវរកញ្ញា ឈុំ ចាន់ដារ៉ា។
ងាកទៅកាន់មុនពេលការស្វែងរកឃើញម្ចាស់មកុដកាលពីរាត្រីថ្ងៃទី ០២ ខែមេសា ឆ្នាំ ២០២៥ កន្លងទៅនេះ មហាជនបានឃើញមកហើយថា កញ្ញា ហុក សារិតុលា ទទួលបានការជួយផ្តល់កម្លាំងចិត្ត ជ្រោមជ្រែង និង បង្ហាត់បង្រៀនដោយផ្ទាល់ពីរៀមច្បង ដែលជាបងស្រីជិតស្និទ្ធរបស់នាង គឺកញ្ញា ពេជ្រ វត្តីសារ៉ាវឌ្ឍី។
លើសពីនោះ មុនថ្ងៃប្រកួតវគ្គផ្តាច់ព្រ័ត្រមកដល់ កញ្ញា ពេជ្រ វត្តីសារ៉ាវឌ្ឍី ក៏បានបង្ហោះវីដេអូមួយនិយាយរៀបរាប់ផ្ញើជូនកញ្ញា ហុក សារិតុលា ដែលចាត់ទុកដូចជាប្អូនស្រីបង្កើត ដោយបង្ហាញការគាំទ្រផ្ដល់កម្លាំងចិត្ត និង ជូនពរយ៉ាងកក់ក្ដៅចំពោះនាង ក្នុងដំណើរប្រកួតវគ្គផ្ដាច់ព្រ័ត្រនេះឱ្យទទួលបានជោគជ័យ និង សុំឱ្យមហាជនជួយស្រឡាញ់គាំទ្រដល់ប្អូនស្រីរបស់នាងផងដែរ។
យ៉ាងណាមិញ ក្រោយ កញ្ញា ហុក សារិតុលា បានរបូតតំណែងមកុដ Miss Supranational Cambodia 2025 ដោយបានត្រឹមលំដាប់រងទី ២ មហាជនបានឃើញបវរកញ្ញា ពេជ្រ វត្តីសារ៉ាវឌ្ឍី ក្នុងនាមជាបងស្រី មិនត្រឹមតែផ្តល់កម្លាំងចិត្តដល់ប្អូននៅលើឆាកអំឡុងពេលបំពាក់មកុដដោយផ្ទាល់ឱ្យ ហុក សារិតុលា នោះទេ តែចុះមកដល់ក្រោមឆាកហើយ កញ្ញា ពេជ្រ វត្តីសារ៉ាវឌ្ឍី បានដើរទៅក្បែរឆាកងើយមុខឱប ថើបកញ្ញា ហុក សារិតុលា ជាប្អូនស្រី ទៀតផង៕
សូមចុចទីនេះ ដើម្បីទស្សនាវីដេអូខាងក្រោម៖
