ដូចមហាជនបានជ្រាបមកហើយ ពីទេពកោសល្យរបស់ អ្នកនាង ខាត់ សុឃីម លើវិថីសិល្បៈ ដែលគេបានដាក់ងារអ្នកនាងថា ជាតារាស្រីពហុជំនាញ។ ក្នុងនោះ ទាំងចម្រៀងបុរាណ សម័យ ទាំងការសម្តែង ទាំងជាពិធីករ និង របាំ ក៏អ្នកនាង ខាត់ សុឃីម អាចធ្វើបាន។
ដោយឡែក ងាកទៅកាន់ការច្រៀងវិញនោះ កន្លងមក រៀមច្បង ខាត់ សុឃីម ធ្លាប់បានសហការណ៍នឹងតារាចម្រៀងប្រុសស្រីក្មេងចាស់ជាច្រើនរូបមកហើយ ដោយក្នុងនោះរួមមាន តារាចម្រៀងរ៉េបស្រករក្រោយទៀតផង។
ក្នុងនោះគេចាំបានថា កាលពីឆ្នាំ ២០២៣ អ្នកនាង ខាត់ សុឃីម បានបកស្រាយចម្រៀងរួមគ្នានឹងតារាចម្រៀងរ៉េប YCN Rakhie សមាជិក La Cima Cartel និង លោក វណ្ណថា គឺបទ «សមុទ្រស្នេហ៍» និង ឆ្នាំ ២០២៤ អ្នកនាង ខាត់ សុឃីម បានបកស្រាយចម្រៀងនឹងតារាចម្រៀងរ៉េប RuthKo គឺបទ «ស្រឡាញ់បងទៅអូន»។ លើសពីនោះ ដើមឆ្នាំ ២០២៥ កន្លងទៅ អ្នកនាង ខាត់ សុឃីម បានបញ្ចេញបទចម្រៀងរួមគ្នានឹងតារាចម្រៀងរ៉េប 1NE មានចំណងជើងថា «បោះសន្ទូចរំលងខេត្ត» ដោយមានទាំងការរ៉េបផងដែរ។
យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុកជាច្រើនបានចាប់អារម្មណ៍ជាថ្មី ខណៈអ្នកនាង ខាត់ សុឃីម បានបង្ហាញវត្តមានក្នុង Documentary របស់តារាចម្រៀងរ៉េប KWAN ដោយបង្ហាញពីការថតចម្រៀងថ្មីរួមគ្នាជាលើកដំបូង។
ក្នុងនោះ លោក KWAN បានបង្ហាញអារម្មណ៍ ក្រោយរួមការងារជាមួយនឹងសិស្សច្បង ដោយលោកបានឱ្យដឹងថា៖ «ខ្ញុំធ្លាប់តែជាក្មេងម្នាក់ ដែលមើលគាត់ក្នុងទូរទស្សន៍ ឥលូវមានឱកាសធ្វើការជាមួយគាត់ក្នុងស្ទូឌីយ៉ោ ស្តាប់សំឡេងគាត់ផ្ទាល់នៅពេលដែលថត គឺរំភើប គាត់ពូកែ ហើយធ្វើការជាមួយបងស្រី ខាត់ សុឃីម គឺពិតជា inspire បានបំផុសគំនិតខ្ញុំជាច្រើននៅពេលធ្វើការជាមួយគ្នា សំឡេងរបស់គាត់នៅពេល record ធ្វើឱ្យខ្ញុំភ្ញាក់ផ្អើលមែនទែន»៕
សូមចុចទីនេះ ដើម្បីទស្សនាវីដេអូ៖
