ជាការពិតណាស់ អ្នកនិយមតាមដាន និង គាំទ្រសិល្បការិនីជំនាន់ថ្មី ជូរី ល្អហួស ច្បាស់ជាបានជ្រាបមកហើយថា ក្រៅពីមានតំណែងជាម្ចាស់មកុដ Miss Preteen Junior Idol World 2024 ហើយនោះ បវរកញ្ញាវ័យក្មេងរូបនេះក៏មានទីផ្សារការងារសិល្បៈជាច្រើន ដោយក្នុងនោះ ជូរី ល្អហួស បានក្លាយជាទូតសុឆន្ទៈឱ្យបណ្តាក្រុមហ៊ុននានា ការថតផ្សព្វផ្សាយផលិតផល សម្អាងការ ក៏ដូចជាការចូលរួមក្នុងកម្មវិធីកម្សាន្តនានាជាច្រើន។ មិនត្រឹមតែប៉ុណ្ណោះ ថ្មីៗនេះ ជូរី ល្អហួស ក៏ក្តោបបានតំណែងជាតួឯកក្នុងការសម្តែងខ្សែភាពយន្តថែមទៀតផង។
លើសពីនោះ ជូរី ល្អហួស ត្រូវបានមហាជនទទួលស្គាល់ពីសមត្ថភាពរបស់នាង តាំងពីមុនការចូលរួមប្រកួតលើវិស័យបវរកញ្ញាមកម្ល៉េះ ដោយ ជូរី ល្អហួស មានដុងសិល្បៈដ៏សម្បូរបែប មិនថាសម័យ និង បុរាណនោះឡើយ។ ម្យ៉ាងវិញទៀត បើនិយាយពីរូបសម្រស់ និង អត្តចរិតវិញនោះ បវរកញ្ញាវ័យ ១៦ ឆ្នាំរូបនេះ ត្រូវបានមហាជនសរសើរថា ពិតជាល្អសមនឹងឈ្មោះរបស់នាងទៀតផង។
ដោយឡែក ក្រឡេកទៅមើលការចូលរួមបង្ហាញពីវប្បធម៌ អរិយធម៌ខ្មែរទៅកាន់ពិភពលោកក៏ដូចគ្នា ជូរី ល្អហួស ត្រូវបានចាត់ទុកជាបវកញ្ញា និង សិល្បការិនីវ័យក្មេងរមែងពាំនាំនូវមោទកភាពសម្រាប់កម្ពុជាផងដែរ។
ជាក់ស្តែង ថ្មីៗនេះ ជូរី ល្អហួស មានកិត្តិយសត្រូវបានអញ្ជើញជាផ្លូវការដោយរដ្ឋបាលក្រុង Harbin ប្រទេសចិន ដើម្បីបង្ហាញវប្បធម៌កម្ពុជា និង ចូលរួមការប្រគំតន្ត្រីនៅទីនោះ។ ក្នុងនោះដែរ ជូរី ល្អហួស បានធ្វើឱ្យមហាជនកម្ពុជាមានមោទកភាពសម្រាប់កូនខ្មែររូបនេះជាថ្មី ដោយនាងបានរាំរបាំអប្សរាក្នុងអាកាសធាតុចុះត្រជាក់ -១៦ °C នៅឯ Harbin Ice Snow World ក្នុងកម្មវិធី Harbin International Ice and Snow Festival ប្រទេសចិន៕
សូមទស្សនា វីដេអូខាងក្រោម៖
