កាលពីថ្ងៃទី ១២ ខែឧសភា ឆ្នាំ ២០២៥ កន្លងទៅនេះ ក្រសួងសុខាភិបាល បានចេញសេចក្តីប្រកាសព័ត៌មានស្តីពីការបង្កើនការការពារខ្លួនពីការឆ្លងវីរុសកូវីដ-១៩ ជូនដល់សាធារណៈជន ដោយបានបញ្ជាក់ថាស្ថានភាពនៃការចម្លងវីរុសកូវីដ-១៩ នៅតែមានបន្តនៅឡើយ។
យ៉ាងណាមិញ ស្របពេលការប្រកាសនៃការបង្កើនការការពារខ្លួនពីការឆ្លងវីរុសកូវីដ-១៩ ស្រាប់តែនៅព្រឹកថ្ងៃទី ១៣ ខែឧសភា ឆ្នាំ ២០២៥ នេះ តារាចម្រៀង ខេម បានបង្ហោះសារមួយធ្វើឱ្យអ្នកគាំទ្រមានការព្រួយបារម្ភ ដោយលោកបានឱ្យដឹងថាពេលនេះលោកកំពុងឆ្លងវីរុសកូវីដ-១៩ និង ប្រាប់ឱ្យមហាជនប្រុងប្រយ័ត្នផងដែរ។
ក្រោយប្រកាសពីការឆ្លងវីរុសកូវីដ-១៩ ហើយនោះ លោក ខេម ក៏បានបង្ហាញពីអាការៈសុខភាពជាបន្តបន្ទាប់ទៅដល់មហាជន និង អ្នកគាំទ្រដែរ ដោយនៅថ្ងៃដដែល លោក ខេម បានឱ្យដឹងពីអាការៈរបស់លោក នៅពេលឆ្លងថា៖ «សួស្តីពុកម៉ែបងប្អូនជាទីស្រលាញ់គ្រប់គ្នា អរគុណសម្រាប់ការព្រួយបារម្ភចំពោះសុខភាពខ្ញុំបាទ។ ពេលនេះខ្ញុំ គឺមិនធ្ងន់ដូចកាលខ្ញុំកើតលើកទី ១ នោះទេ គ្រាន់មានអាការខ្លះដូចជា ក្តៅខ្លួន ហៀរសំបោរ ឈឺក មានក្អកបន្តិចបន្តួច និង ឈឺតាមសាច់ដុំប៉ុណ្ណឹង។ ខ្ញុំបានទៅពិនិត្យសុខភាពកាលពីព្រឹកមិញនៅមន្ទើរពេទ្យ -Khema- ពេទ្យពិនិត្យឃើញថាខ្ញុំមានឆ្លងមេរោគកូវីដយ៉ាងពិតប្រាកដមែន ប៉ុន្តែខ្ញុំក៏មិនបានសួរបញ្ជាក់ថាខ្ញុំកើតប្រភេទអីដែរ។ ខ្ញុំបង្ហោះមិនមានគំនិតបំភ័យបងប្អូនរ ឬកុហកណាមួយទេ បងប្អូនអាចធ្វើការធម្មតា ប៉ុន្តែត្រូវការពារខ្លួនកុំឱ្យឆ្លងដូចខ្ញុំ ហើយសូមបងប្អូនកុំយល់ច្រលំ កូវីដគឺ កូវីដ ផ្តាសសាយ គឺផ្តាសសាយ។ មនុស្សមិនតិចជាងរាប់លាននាក់ទេ ដែលរងគ្រោះដោយសារជំងឺមួយនេះ! អរគុណ សូមព្រះប្រទានពរ »។
ដោយឡែក នៅថ្ងៃទី ១៤ ខែឧសភា ឆ្នាំ ២០២៥ កន្លងទៅ លោក ខេម ក៏បានចេញមកជម្រាបពីស្ថានភាពជំងឺលោកបន្ថែមទៀតដែរ ដោយលោកថា លោកឆ្លង៣-៤ ថ្ងៃហើយ ហើយឆ្លងលើកនេះ គឺខុសពីលើកមុន ដោយលើកមុនលោកដាក់ថ្នាំ ពីម្ងៃទៅម្ងៃរាងធូរ ប៉ុន្តែឆ្លងលើកនេះ ខុសប្លែកពីមុន ពេលខ្លះស្រួល ពេលខ្លះក្តៅខ្លួនភ្លាម ហើយអស់កម្លាំង និង ស្លេសច្រើន។
តែយ៉ាងណាវីដេអូចុងក្រោយ ដែលបាន update ពីស្ថានភាពរបស់ខ្លួននៅថ្ងៃទី ១៥ ខែឧសភា ឆ្នាំ ២០២៥ លោក ខេម បានឱ្យដឹងថា លោកបានធូរច្រើនហើយ ព្រោះលោកបានឆ្ពុងច្រើន៕
សូមចុចទីនេះ ដើម្បីទស្សនាវីដេអូកាលពីថ្ងៃទី ១៤៖
សូមចុចទីនេះ ដើម្បីទស្សនាវីដេអូកាលពីថ្ងៃទី ១៥៖
