នៅរសៀលថ្ងៃទី ០៤ ខែវិច្ឆិកា ឆ្នាំ ២០២៤ នេះ ស្នងការដ្ឋាននគរបាលរាជធានីភ្នំពេញ បានបញ្ជាក់ឱ្យបានដឹងថា កម្លាំងប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ ៧ មករា សហការជាមួយកម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ និង កម្លាំងអធិការដ្ឋាននគរបាលខណ្ឌទួលគោក បានស្រាវជ្រាវឃាត់ខ្លួនបានយុវជនម្នាក់ដែលប្រើអំពើហិង្សា វេលាម៉ោងប្រមាណ ១២ និង ២០ នាទី ថ្ងៃទី ០៣ ខែវិច្ឆិកា ឆ្នាំ ២០២៤ ស្ថិតក្នុងខណ្ឌទួលគោក រាជធានីភ្នំពេញ បានហើយ។
ជនសង្ស័យមានឈ្មោះ សុខ សេន អាយុ ៣១ ឆ្នាំ មុខរបរអ្នកដឹកជញ្ជូន រស់នៅផ្ទះលេខ ១០ ជាន់ទី ៦ អគារទី ២ ផ្លូវ ២១១ ភូមិ ១២ សង្កាត់វាលវង់ ខណ្ឌ ៧ មករា ត្រូវបានឃាត់ខ្លួននៅវេលាម៉ោង ១២ និង ៣០ នាទីថ្ងៃទី ០៤ ខែវិច្ឆិកា ឆ្នាំ ២០២៤ ទាក់ទិនទៅនឹងករណីប្រើអំពើហិង្សាយកខ្សែក្រវ៉ាត់ និង កាំបិតបុ័ងតោវាយ-កាប់ទៅលើបុរសម្នាក់បណ្តាលឱ្យរងរបួស និង កាប់បំផ្លាញម៉ូតូជនរងគ្រោះរងការខូចខាត ពេលមានការប៉ះពាក្យសម្ដីគ្នាបង្កជាជម្លោះ នៅចំណុចភូមិទី ១០ សង្កាត់បឹងសាឡាង ខណ្ឌទួលគោក កាលពីថ្ងៃទី ០៣ ខែវិច្ឆិកា ឆ្នាំ ២០២៤ កន្លងទៅ។
បច្ចុប្បន្នជនសង្ស័យត្រូវបានកម្លាំងនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ នាំយកទៅសាកសួរ និង កសាងសំណុំរឿងចាត់ការតាមនីតិវិធី ដែលរឿងរ៉ាវនេះបានធ្វើឱ្យមហាជនអ្នកតាមដានលើហ្វេសប៊ុកមានការចាប់អារម្មណ៍យ៉ាងខ្លាំង៕
សូមទស្សនាវីដេអូនៅខាងក្រោម ៖
