ថ្មីៗនេះ មហាជនអ្នកប្រើប្រាស់បណ្ដាញសង្គម ជាពិសេសអ្នកតាមដានពីសកម្មភាពដំរី Lucky ច្បាស់ជាបានជ្រាបមកហើយនូវដំណឹងដ៏សោកសៅ ដែលដំរី Lucky បានលាចាកលោកហើយ កាលពីព្រឹកថ្ងៃអាទិត្យ ទី ២៤ ខែសីហា ឆ្នាំ ២០២៥ បន្ទាប់ពីធ្លាក់ខ្លួនឈឺភ្លាមៗកាលពីល្ងាចថ្ងៃសុក្រកន្លងទៅ។
ការចាកចេញរបស់ Lucky បានធ្វើឱ្យមហាជនមានការរំជួលចិត្ត និង សោកសង្រេងយ៉ាងខ្លាំង ខណៈ Lucky បានចាកចេញទៅភ្លាមៗពេក។ ក្នុងនោះដែរ ក៏មានមហាជនជាច្រើនបានចូលរួមរំលែកទុក្ខ និង បង្ហាញការអាឡោះអាល័យជាបន្តបន្ទាប់នៅលើបណ្តាញសង្គមនានា ក៏ដូចជាបានទៅជូនដំណើរ Lucky ជាលើកចុងក្រោយទៀតផង។
ងាកមកកាន់ ឧកញ៉ា ព្រាប សុវត្ថិ វិញ ក៏បានបង្ហាញអារម្មណ៍សោកសៅនៃការចាកចេញរបស់ Lucky ដូចគ្នាដែរ ព្រោះកន្លងមក Lucky ធ្លាប់បានសម្តែងក្នុងចម្រៀង «ដំរីថ្នមស្នេហ៍» ជាមួយគ្នា។ ម្យ៉ាងវិញទៀត ថ្មីៗនេះ ឧកញ៉ា ព្រាប សុវត្ថិ ក៏ទើបតែទៅលេង Lucky ម្តងទៀតផងដែរ។
ក្នុងនោះ ឧកញ៉ា ព្រាប សុវត្ថិ បានបង្ហោះវីដេអូកាល Lucky នៅមានជីវិត ដោយអមនឹងសារមួយឃ្លាថា ៖ «អនុស្សាវរីយ៍ ដែលដំរី lucky បានទុកឱ្យមហាជនខ្មែរទស្សនា និង ស្រណោះ។ ដោយក្ដីស្រលាញ់យ៉ាងច្រេីនលេីសលុបលើ ដំរី lucky សូមឱ្យ lucky កេីតមក កំណេីតជាមនុស្ស បានដឹងបានទទួលការស្រលាញ់ពីមនុស្សផងទាំងពួង»៕
