មហាជន ដែលតាមដានពីអាការរបស់កុមារា ឆលី ដែលដុះដុំសាច់ក្នុងខួរក្បាល ព្រមទាំងទទួលបានការវះកាត់យ៉ាងជោគជ័យទៅហើយ កាលពី ២ ខែកន្លះមុន ច្បាស់ជាបានដឹងដំណឹងមកហើយថា ដុំសាច់ខួរក្បាលនោះបានដុះឡើងវិញ។ លើសពីនោះ អ្វីកាន់តែរន្ធត់ គ្រូពេទ្យប្រចាំរបស់ ឆលី បញ្ជាក់ថា ឆលី មិនអាចបន្តការព្យាបាលទៀតបានទេ បានត្រឹមប្រើប្រាស់ថ្នាំដើម្បីរក្សាពេលវេលារស់នៅជាមួយគ្រួសារ និង បងប្អូនមួយរយៈពេលប៉ុណ្ណោះ។
ក្នុងនោះដែរ ក្រោយទទួលដំណឹងរបស់កូនប្រុសដ៏អព័ភ្វហើយនោះ តាមរយៈផេកផ្លូវការរបស់ ឆលី បានបង្ហោះសារបង្ហាញអារម្មណ៍យ៉ាងក្តុកក្តួល ធ្វើឱ្យមហាជនមិនអាចទប់ទឹកភ្នែកបាននោះឡើយ ខណៈកូនប្រុសបណ្តូលចិត្ត ប្រឹងប្រែងតស៊ូអស់ជាច្រើនឆ្នាំ តែទីបំផុតមិនអាចឆ្លងផុតគ្រោះកាចនេះបាន។
យ៉ាងណាមិញ បើទោះជាឈានដល់ដំណាក់កាលនេះក្តី ក្រុមគ្រួសាររបស់កុមារា ឆលី នៅតែមានសង្ឃឹមទោះជាតិចតួចក្តី ដោយឪពុកម្តាយ ឆលី ត្រៀមបញ្ជូន ឆលី ទៅព្យាបាលនៅឯសហរដ្ឋអាមេរិក។ ក្នុងនោះ ប៉ាម៉ាក់ ឆលី បានដឹងព័ត៌មានពីមន្ទីរពេទ្យរួចរាល់ហើយ ប៉ុន្តែអ្វីដែលចាំបាច់ គឺការបញ្ជូន ឆលី ទៅព្យាបាលឱ្យទាន់ពេលវេលា។
ក្នុងនោះ ប៉ាម៉ាក់ ឆលី បានបង្ហោះសារសុំឱ្យមហាជនចែករំលែក ដើម្បីឱ្យដំណឹងអំពាវនាវបានឮទៅដល់ លោកជំទាវ បណ្ឌិត ពេជ ច័ន្ទមុនី ក្នុងការជួយសម្រួលការរៀបចំឯកសារធ្វើដំណើរជូនដល់ ឆលី ផង ដោយបានរៀបរាប់ថា៖ «ក្តីសង្ឃឹមចុងក្រោយរបស់ ឆលី គឺមានតែមួយទៅព្យាបាលនៅសហរដ្ឋអាមេរិក ខ្ញុំសុំក្តីគោរពមេត្តាពី លោកជំទាវបណ្ឌិត ពេជ ច័ន្ទមុន្នី ដែលលោកអាចជួយសម្រួលបញ្ជូន ឆលី ចេញទៅព្យាបាលលឿនរហ័ស ព្រោះលោកជំទាវមានក្ដីមេត្តាជួយក្មេងៗជាច្រើន។ សូមលោកជំទាវជួយក្មេងតូចម្នាក់នេះផង ដែលគ្នាចង់រស់នៅជួបជុំគ្រួសារ»៕
សូមចុចទីនេះ ដើម្បីទស្សនាវីដេអូ៖
