និយាយពីស្រីស្អាត អូនផ្កាយ មហាជនអ្នកគាំទ្រវិស័យសិល្បៈបានស្គាល់ហើយថា នាងធ្លាប់ជាតារាសម្ដែងស្រីមានប្រជាប្រិយភាពមួយរូប ធ្លាប់លេចមុខក្នុងខ្សែភាពយន្តភាគខ្មែរ និង សាច់រឿងខ្លីៗជាច្រើនកន្លងមក។
លើសពីនេះ អូនផ្កាយ ក៏ធ្លាប់ទទួលបានការស្រឡាញ់គាំទ្រ និង សរសើរពីស្នាដៃសម្ដែងរឿងភាគខ្លីៗរបស់ផលិតកម្ម Sastra Film ផងដែរ។ ម្យ៉ាងវិញទៀត តារាស្រីនិយមលេងខ្លួនបែបសិចស៊ី ដើមទ្រូងទ្រលុកទ្រលន់រូបនេះ ក៏មានទីផ្សារខ្លាំងលើវិស័យអនឡាញដែរ ត្រូវបានម្ចាស់ប្រេនធំៗឱ្យជួយថតផ្សព្វផ្សាយផលិតផលល្បីៗក្នុងស្រុកជាច្រើន។
យ៉ាងណាមិញ មួយរយៈធំហើយ ដែលតារាស្រីរូបនេះ បានផ្ដាច់ខ្លួនពីអាជីពសិល្បៈសម្ដែង ងាកទៅសាងគ្រួសារតូចមួយជាមួយស្វាមី និង មានកូនស្រី ២ នាក់ ព្រមទាំងបានចាប់ផ្ដើមបើកមុខរបររកស៊ីផ្ទាល់ខ្លួនតាមអនឡាញបន្តបន្ទាប់។ ពេលនេះដែរ អូន ផ្កាយ ក៏បានពង្រីកអាជីវកម្មរបស់ខ្លួនលើវិស័យអនឡាញ ព្រមទាំងបានច្នៃរបស់ញ៉ាំលក់តាមរ៉ឺម៉ក ២ នាក់ប្ដីប្រពន្ធ ដែលកំពុងផ្ទុះល្បីខ្លាំងមានឈ្មោះថា «បាញ់ត្រាងញៀនសាហាវ»។
ស្របពេលនេះ ក៏បានឃើញ អូនផ្កាយ និយាយរៀបរាប់ក្នុងវីដេអូមួយ ខណៈត្រូវបានអ្នកគាំទ្រជាច្រើនចង់ឱ្យនាងវិលចូលវិស័យសម្ដែងវិញនោះ ដែលនាងក៏បានបង្ហាញការនឹករឭកនូវអាជីពចាស់ចង់ចូលសម្ដែងវិញដែរ ប៉ុន្តែពេលនេះ នាងសុំពេលពង្រឹងរបររកស៊ីលក់បាញ់ត្រាងរបស់នាងឱ្យដំណើរការកាន់តែកាក់កបបន្ដិចទៀតសិន៕
សូមចុចទីនេះដើម្បីទស្សនាវីដេអូ៖
